The news is by your side.

Advertisement

لندن میں چاقو زنی کا شکارایک سالہ بچے کی حالت نازک

لندن : برطانیہ میں ایک سالہ بچے اور اس کی ماں کو چاقو کے وار کرکے زخمی کردیا گیا، بچے کی حالت تشویش ناک ہے ، پولیس کے مطابق حملہ آور جان پہچان کا شخص ہے۔

تفصیلات کے مطابق چاقو زنی کا یہ واقعہ گزشتہ روز مغربی لندن کے علاقے  سوئن فیلڈ کلوز میں ایک گھر میں پیش آیا  ، ایک شخص نے گھر میں داخل ہوکر تیس سالہ ماں اور ایک سالہ بچے پر چاقو سے وار کیے۔

اسپتال ذرائع کا کہنا ہے کہ ماں کو پیش آنے والے زخم مہلک نہیں ہیں تاہم شیر خوار بچے کے جسم پر لگنے والے وار کاری ہیں جن  کے سبب اس کی حالت تشویش ناک ہے۔پولیس اور طبی  امداد فراہم کرنے والے عملے کو گزشتہ شام فون پر واقعے کی اطلاع دی گئی۔ ماں  اور بچے  کو ایئر ایمبولینس کے ذریعے اسپتال منتقل کیا گیا  جہاں ان کاعلاج جاری ہے۔

پولیس کے مطابق حملہ آور کو متاثرہ خاتون پہچانتی ہیں  اور اس کا پتا بھی فراہم کیا گیا ہے تاہم وہ فراہم کردہ پتے پر موجود نہیں ہے ۔ پولیس اس کی تلاش کررہی ہے۔ پولیس کی جانب سے متاثرہ ماں اور بچے کی شناخت جاری نہیں کی گئی ہے۔

خیال رہے کہ برطانیہ میں چاقو زنی کی وارداتوں میں  رواں سال اضافہ دیکھنے میں آیا ہے اور متعدد افراد اپنی جان سےجا چکے ہیں جبکہ کئی زخمی بھی ہوئے ہیں۔ا س حوالے سے امریکی صدر ڈونلڈ ٹرمپ نے برطانیہ پر تنقید کرتے ہوئے کہا تھا کہ لندن  کو  بندوقوں کے حملوں نے نہیں بلکہ چاقوحملوں نے  وارزون میں تبدیل کردیا  ہے۔

خیال رہے کہ برطانیہ کے دارالحکومت لندن میں رواں سال چاقو زنی کی وارداتوں میں 50 سے زائد افراد قتل ہوچکے ہیں۔


خبر کے بارے میں اپنی رائے کا اظہار کمنٹس میں کریں‘ مذکورہ معلومات  کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں

Comments

comments

یہ بھی پڑھیں