لندن: برطانیہ میں 1976 کے بعد شدید گرمی نے سارے ریکارڈ توڑ دئیے، شدید گرمی سے نارتھ ویسٹ اور یارکشائر میں پانی کے ذخائر میں کمی کا خدشہ پیدا ہوگیا ہے۔
برطانوی میڈیا کے مطابق جھلسا دینے والی گرمی سے گھاس اور دیگر فصلوں کو بھی نقصان پہنچا ہے، پانی سپلائی کرنے والی کمپنیوں نے بھی پانی کے کم استعمال کے حوالے سے انتباہ جاری کیا ہے تاکہ پانی کی کمی نہ ہو۔
[bs-quote quote=”مساجد میں پانی کی قدر و اہمیت کے حوالے سے خصوصی لیکچر دیا گیا تاکہ پانی کا ضیاع کم سے کم کیا جائے” style=”style-2″ align=”left”][/bs-quote]
پانی سپلائی کرنے والی کمپنیوں نے اس حوالے سے اخباروں، ریڈیو اور ٹی وی پر آگاہی مہم کا آغاز کردیا ہے، اولڈہم میں موجود یورپین اسلامک سینٹر نے بھی کمیونٹی کو پانی کی قلت کے حوالے سے آگاہی مہم کا آغاز کیا ہے۔
مساجد میں پانی کی قدر و اہمیت کے حوالے سے خصوصی لیکچر دیا گیا تاکہ پانی کا ضیاع کم سے کم کیا جائے، خواتین برتن دھوتے وقت کم پانی استعمال کریں، پودوں کو پانی دیتے وقت پائپ کی بجائے کین استعمال کریں۔
برطانوی میڈیا کے مطابق پانی کے ذخائر میں واضح کمی بارش کے باعث ہے اور اگست کے مہینے میں بھی بارش کا امکان بہت کم ہے اس لیے ایشیائی کمیونٹی کو بھی اس تنبیہ کی نوعیت سمجھتے ہوئے اپنا کردار ادا کرنا ہوگا۔
