یوکرین میں مسلح شخص نے مسافروں سے بھری بس کو ہائی جیک کر کے مسافروں کو یرغمال بنا لیا۔
بین الاقوامی میڈیا رپورٹس کے مطابق یوکرین کے مغربی شہر لوٹکس میں دن دیہاڑے ایک مسلح شخص نے مسافروں سے بھری بس کو بیچ سڑک پر روک کر اسے ہائی جیک کر لیا۔
ہائی جیکر نے پولیس کی جانب ایک گرینیڈ پھینکا مگر خوش قسمتی سے وہ پھٹ نہیں سکا، جس کے بعد اس نے دو گولیاں بھی فائر کیں۔
پولیس نے ہائی جیکر کی شناخت 44 سالہ میکسم سے ظاہر کرتے ہوئے بتایا کہ اس کا تعلق روس سے ہے اور وہ پہلے بھی عدالت سے سزا پا چکا ہے۔
ہائی جیکر نے پولیس سے مذاکرات میں بتایا ہے کہ اس نے شہر کے عوامی مقامات پر دھماکا خیز مواد نصب کر رکھے ہیں جو زوردار دھماکوں سے پھٹ جائیں گے۔
فوری طور پر مسلح شخص کے مطالبات سامنے نہیں آئے اور پولیس مسلسل بات چیت کے لیے کوششیں جاری رکھے ہوئے، بس کو انسداد دہشتگردی اسکواڈ نے گھیرے میں لے رکھا ہے اور بکتر بند گاڑیاں طلب کر لی گئی ہیں۔
