تازہ ترین

یوکرائن: صدر کی حلف برداری ہوتے ہی پارلیمنٹ تحلیل

کیف: یوکرائن کے نومنتخب صدر ولودیمیر زیلنسکی نے حلف اٹھاتے ہی پارلیمنٹ تحلیل کردی۔

غیرملکی خبررساں ادارے کے مطابق یوکرائن کے نومنتخب صدر ولودیمیر زیلنسکی نے اپنے عہدے کا حلف اٹھایا اور پہلے حکم نامے میں پارلیمنٹ کو تحلیل کردیا۔

نومنتخب صدر نے حلف اٹھانے کے بعد اپنی تقریر میں مشرقی حصے میں جنگی حالات ختم کرنے کے عزم کا اظہار کیا۔

زیلنسکی نے حلف برداری تقریب میں شریک ہونے کے لیے روایتی طریقے سے انحراف کیا اور لوگوں کے بیچ چلتے ہوئے پارلیمنٹ تک پہنچے، پیدل چلتے ہوئے انہوں نے کئی لوگوں کے ساتھ تصاویر بنوائیں اور ہاتھ بھی ملایا۔

مزید پڑھیں: کامیڈین ولودیمیر زیلنسکی یوکرائن کے صدر منتخب

دوسری جانب زیلنسکی کے ایک مشیر نے کہا ہے کہ قبل ازوقت پارلیمانی انتخابات رواں برس اکیس جولائی کو ہوسکتے ہیں۔

رپورٹ کے مطابق نئے صدر نے اپنی کابینہ کی تشکیل نہیں کی ہے تاہم ایسا خیال کیا گیا ہے کہ وہ چند روز میں اہم عہدوں کی تقرریاں کرسکتے ہیں۔

واضح رہے کہ ولودیمیر زیلنسکی نے گزشتہ ماہ صدارتی انتخابات میں 73 فیصد ووٹ حاصل کرکے کامیابی حاصل کی تھی۔

یوکرائن کے صدر زیلنسکی سیاست میں آنے سے قبل مزاحیہ اداکار تھے، انتخابی مہم کے دوران انہیں مزاحیہ اداکار ہونے پر سخت تنقید کا نشانہ بھی بنایا گیا۔

Comments

- Advertisement -