لیجنڈری کامیڈین اور اداکار مرحوم عمر شریف کی اہلیہ زرین عمر کا کہنا ہے کہ عمر کی موت کا وسیلہ بننے والوں کو کبھی معاف نہیں کروں گی۔
تفصیلات کے مطابق معروف کامیڈین اور اداکار عمر شریف کی اہلیہ زرین عمر نے فوٹو اور ویڈیو شیئرنگ ایپ انسٹاگرام پر ایک ویڈیو شیئر کرتے ہوئے شوہر کے نام جذباتی پیغام شیئر کردیا۔
زرین عمر نے پوسٹ کے کیپشن میں لکھا کہ ’40 دن سے میں نے ناشتہ، کھانا نہیں بنایا، شادی کے وقت کے کھانا پکانا آتا ہی نہیں تھا سب عمر کے لیے سیکھا۔‘
انہوں نے لکھا کہ ’صبح عمر کے لیے ناشتہ بنا کر ٹرالی سجا کے لانا اچھا لگتا تھا، اب میں ناشتہ نہیں بناتی، اب صبح اٹھ کر چائے کا کپ سائیڈ ٹیبل پر نہیں رکھتی، اب صبح ٹی وی آن نہیں کرتی، اب عمر کی کرسی پر کوئی نہیں بیٹھتا، اس پر ان کی کچھ چیزیں رکھی ہیں۔‘
زرین عمر نے لکھا کہ ’سب بدل گیا مگر عمر کی موت کے لیے جو وسیلہ بنے ان کو معاف نہیں کروں گی، جو ساری دنیا کو ہنساتا تھا ان کو جس نے رلایا انہیں معاف نہیں کروں گی، 40 دن پہلے شادی شدہ تھی اور آج بیوہ ہوں، میں کسی کو معاف نہیں کروں گی۔‘
واضح رہے کہ ڈیڑھ ماہ قبل شدید علالت کے بعد لیجنڈ کامیڈین عمر شریف جرمنی کے اسپتال میں انتقال کر گئے۔
لیجنڈری اداکار و کامیڈین عمر شریف کافی عرصے سے عارضہ قلب، گردے اور دیگر مختلف بیماریوں میں مبتلا تھے۔
