کراچی: پی ایس 52 عمر کوٹ میں ضمنی انتخابات کے حوالے سے الیکشن کمیشن نے بڑا قدم اٹھا لیا۔
اے آر وائی نیوز کے مطابق سندھ کے شہر عمر کوٹ کے انتخابی حلقے پی ایس 52 میں تعینات 53 پریذائیڈنگ اور اسسٹنٹ پریذائیڈنگ افسران کو ہٹا دیاگیا۔
الیکشن کمیشن کے ذرائع نے بتایا ہے کہ پریذائیڈنگ افسران پر سیاسی وابستگی کا الزام تھا، کمیشن کو اس کی شکایت موصول ہوئی تھی جس پر کارروائی کرتے ہوئے ان افسران کو ہٹایاگیا۔
ذرائع کے مطابق انتخابی افسران کے خلاف گرینڈ ڈیموکریٹک الائنس (جی ڈی اے) کے امیدوار نے الیکشن کمیشن میں درخواست دائر کی تھی۔
ہٹائے گئے عملے کو مختلف پولنگ اسٹیشنز پر تعینات کیا گیا تھا، گزشتہ دنوں صوبائی الیکشن کمشنر نے عمر کوٹ کا دورہ کیا تھا، جس میں الیکشن کمشنر نے امیدوار غلام ارباب سے تحفظات سنے تھے۔
واضح رہے کہ پی ایس 52 عمر کوٹ میں ضمنی الیکشن کے لیے ووٹنگ کل ہوگی، الیکشن کمیشن کی جانب سے تیاریاں مکمل کر لی گئی ہیں، ووٹنگ کا تمام سامان پولنگ اسٹیشنز پر پہنچایا جا چکا ہے۔
پی ایس 52 ضمنی الیکشن میں 12 امیدوار مدِ مقابل ہیں، پیپلز پارٹی کے امیر علی شاہ اور جی ڈی اے امیدوار ارباب غلام رحیم کے درمیان کانٹے کا مقابلہ ہوگا۔ اس حلقے میں ووٹرز کی کل تعداد ایک لاکھ 53 ہزار 935 ہے، جن میں خواتین ووٹرز کی تعداد 70919 ہے، حلقے میں پولنگ اسٹیشنز کی تعداد 128ہے جن میں سے 50 انتہائی حساس اور 40 حساس قرار دیے گئے ہیں۔
