کراچی : لیجنڈری اداکار عمر شریف کے بیٹے نے ان کی بیماری کی افواہوں کی تردید کرتے ہوئے کہا عمر شریف بالکل صحت مند ہیں،ان کی بیماری سے متعلق خبروں اور ویڈیوز سے ہمارے جذبات مجروح ہوئے۔
تفصیلات کے مطابق لیجنڈری اداکار عمر شریف کی طبیعت سے متعلق خبروں کی تردید کرتے ہوئے بیٹے جواد عمر نے ویڈیو بیان جاری کردیا ہے۔
ویڈیو میں عمر شریف کے بیٹے کا کہنا تھا والد کی طبعیت ٹھیک ہے، وہ تندرست ہیں اور گھر پر ہی ہیں اور آرام کررہے ہیں، ان کی صحت کےحوالے سے افواہیں پھیلائی جارہی ہیں، عمرشریف جنرل چیک اپ کیلئےگئے، جوسب کو کرانا چاہیے۔
جواد عمر نے مزید کہا عمرشریف ریہرسل کر رہے ہیں اور امریکاکادورہ کرنےوالے ہیں، وہ پورٹ گرینڈ پر شو کررہے ہیں جبکہ عید پر بھی پلےکیا تھا۔
عمر شریف کے بیٹے کا کہنا تھا چینلزاور سوشل میڈیا پربغیر تصدیق خبریں نہ چلائی جائیں، مداحوں سے اپیل ہے کہ افواہیں پھیلانے سے گریز کریں۔
جواد عمر نے مزید کہا بےبنیاد خبروں سے ہمارے جذبات کو ٹھیس پہنچی، کچھ عرصہ قبل بھی اس طرح کی افواہیں پھیلائی گئی تھیں۔
خیال رہے یہ خبریں گردش کر رہی تھیں کہ کامیڈین عمر شریف کی طبیعت اچانک بگڑ گئی، جس کے بعد انہیں ہنگامی طور پر ہسپتال منتقل کرنا پڑا۔
