اسلام آباد : وزیراعظم کے معاون خصوصی علامہ طاہر اشرفی نے پاکستان کی مدد کرنے پر سعودی حکومت کا شکریہ ادا کرتے ہوئے کہا ہے کہ بہت جلد پاکستان سے بھی عمرہ زائرین اور فلائٹس کا سلسلہ شروع ہوگا۔
تفصیلات کے مطابق وزیراعظم کے معاون خصوصی برائے بین المذاہب ہم آہنگی علامہ طاہر اشرفی نے میڈیا سے گفتگو کرتے ہوئے کہا ہے کہ پاکستان کی مدد کرنے پر سعودی حکومت کا شکر گزار ہوں ، پاکستان اور سعودی عرب کی دوستی لازوال ہے پاکستان کاسعودی عرب سے تعلق ایمان کا تعلق ہے۔
علامہ طاہر اشرفی کا کہنا تھا کہ سعودی عرب نےہمیشہ مشکل وقت میں پاکستان کی مدد کی ، سعودی بزنس کمیونٹی نے کانفرنس میں شرکت اوروزیراعظم کوسنا ، پاکستان سعودی عرب پر دہشت گرد حملوں کی مذمت کرتا ہے۔
معاون خصوصی نے کہا کہ بہت جلد پاکستان سے بھی عمرہ زائرین اور فلائٹس کا سلسلہ شروع ہوگا۔
کالعدم تنظیم کے احتجاج کے حوالے سے ان کا کہنا تھا کہ پاکستان میں توڑ پھوڑ انتشار اور جو خون بہا نقصان بھی ملک کو ہوا، حکومت مذاکرات کیلئے تیار ہے گزارش ہے راستے کھول دیے جائیں۔
علامہ طاہر اشرفی نے مزید کہا پولیس والے جو شہید ہوئے کیا وہ عاشق رسولﷺ نہیں تھے، شہید پولیس اہلکاروں کی مغفرت کیلئے دعا گو ہوں، تشدد کبھی مسائل کا حل نہیں ہوتا ،مذاکرات کی طرف جانا چاہیے ، پرتشدد تحریکوں کا انجام دنیا نے دیکھا ہے۔
معاون خصوصی کا کہنا تھا کہ وزیراعظم نے اقوام متحدہ میں توہین رسالت کا معاملہ اٹھایا ۔ پاکستان ایٹمی قوت ہے کمزور نہیں مگر آپس کا ٹکراؤٹھیک نہیں ، شہید پولیس اہلکاروں کی مغفرت کیلئے دعا گو ہوں۔
انھوں نے کہا کہ ہماری کوشش ہے ، مذاکرات کے ذریعے مسئلے کو حل کریں، امریکا نے 20 سال جنگ لڑنے کے بعد مذاکرات ہی کیے، تمام راستے کھول دینے چاہییں اس سےعوام کو تکلیف ہورہی ہے۔
