نیویارک: اقوام متحدہ نے فلسطینیوں کے لیے 9 کروڑ 50 لاکھ ڈالر کی ہنگامی امداد کی اپیل کر دی ہے۔
تفصیلات کے مطابق اقوام متحدہ نے اسرائیل اور حماس کے درمیان حالیہ برسوں کی شدید 11 روزہ جھڑپوں کے خاتمے کے بعد فلسطینیوں کی مدد کے لیے ساڑھے نو کروڑ ڈالرز کی اپیل کی ہے۔
اقوام متحدہ نے یہ اپیل اگلے تین ماہ کے دوران غزہ اور غرب اردن بشمول مشرقی یروشلم میں فلسطینیوں کی امداد کے لیے کی ہے۔
فلسطینی علاقوں کے لیے اقوام متحدہ کے ہیومینیٹری کو آرڈینیٹر لن ہیسٹنگز نے کہا کہ یو این فی الحال امداد کی فوری ضرورتوں پر غور کر رہا ہے اور اس کے بعد طویل مدتی نقصان کا اندازہ لگائے گا، یہ جاننے کے لیے کہ تعمیر نو کے لیے کس قدر ضرورت پڑ سکتی ہے۔
Today, with @antonioguterres & @UNReliefChief, I called on Member States to contribute towards a $95M emergency plan to support people affected by the latest escalation and violence in #Gaza & the #WestBank, inc #EastJerusalem over the next 3 months: https://t.co/It5D8ETg7a pic.twitter.com/YdECUJb7KL
— Lynn Hastings (@LynnHastings) May 27, 2021
انھوں نے کہا کہ جمعرات کو ممبر ممالک سے کی جانے والی یہ اپیل ’فوری ضرورتوں‘ جیسا کہ خوراک، صحت، ادویات، طبی سامان، بنیادی ڈھانچے کی فوری مرمت اور نقد امداد کی فراہمی کے لیے کی گئی ہے۔ اس اپیل سے ہٹ کر بھی اقوام متحدہ نے ضروریات کو پورا کرنے کے لیے پہلے ہی دوسرے فنڈز سے 22.5 ملین ڈالر جاری کیے ہیں۔
واضح رہے کہ فلسطینی حکام نے اندازہ لگا کر بتایا تھا کہ غزہ میں تعمیر نو کے لیے کروڑوں ڈالر درکار ہوں گے، جب کہ صحت کے حکام نے بتایا تھا کہ 11 دن کی لڑائی کے دوران کم از کم 254 افراد مارے گئے ہیں، ان میں سے صرف 13 افراد اسرائیل میں حماس کی راکٹوں کا نشانہ بن کر ہلاک ہوئے ہیں، باقی اسرائیلی افواج کے ہاتھوں شہید فلسطینی ہیں۔
ہیسٹنگز کا کہنا تھا کہ اس لڑائی میں غزہ میں 8 لاکھ افراد لائن سے آنے والی پانی سے محروم ہو چکے ہیں، 285 عمارتیں ملبے کا ڈھیر بن چکی ہیں، جب کہ ایک ہزار ہاؤسنگ اور کمرشل یونٹس تباہ ہوئے۔