The news is by your side.

ماموں بھانجا گینگ کا سرغنہ گرفتار

کراچی: انتہائی مطلوب اسٹریٹ کریمنل گروہ ماموں بھانجا گینگ کا سرغنہ اتحاد ٹاؤن سے گرفتار ہو گیا۔

تفصیلات کے مطابق کراچی میں انتہائی مطلوب اسٹریٹ کریمنل گروہ کا سرغنہ شاہ رخ عرف بارود کو اتحاد ٹاؤن سے گرفتار کر لیا گیا۔

ایس ایس پی فدا حسین جانوری کے مطابق ملزم کے قبضے سے غیر قانونی 9 ایم ایم پستول بمع راؤنڈ برآمد ہوا، ملزم موبائل شاپ ڈکیتی اور اسٹریٹ کرائم کے 5 مقدمات میں مفرور تھا۔

ملزم بلدیہ ڈویژن میں متعدد وارداتوں میں ملوث ماموں بھانجا گینگ کا سرغنہ ہے، ماموں بھانجا گینگ کے 6 کارندے کچھ روز قبل ہی تھانہ اتحاد ٹاؤن سے گرفتار ہو کر جیل جا چکے ہیں۔

ادھر سمن آباد پولیس نے بھی اسٹریٹ کرمنلز کے ساتھ مقابلے میں دو طرفہ فائرنگ کے نتیجے میں ایک ڈاکو کو زخمی حالت میں گرفتار کر لیا، یہ مقابلہ بلاک 20 فائر بریگیڈ اسٹیشن کے قریب ہوا۔

سمن آباد پولیس نے مشتبہ موٹر سائیکل سوار کو رکنے کا اشارہ کیا تھا، تاہم ملزم نے پولیس پر فائرنگ کرتے ہوئے فرار ہونے کی کوشش کی، پولیس کی جوابی فائرنگ سے وہ زخمی ہو کر گر گیا۔

گرفتار زخمی ملزم کی شناخت سیف اعجاز عرف بلا ولد اعجاز کے نام سے ہوئی ہے، جس کے قبضے سے 1 عدد 9 ایم ایم پسٹل، لوڈ میگزین، 2 عدد موبائل فون، نقد رقم اور موٹر سائیکل برآمد ہوئی۔

Comments

یہ بھی پڑھیں