بینونی: پاکستان نے انڈر 19 ورلڈ کپ کے کوارٹر فائنل میچ میں افغانستان کو 6 وکٹوں سے شکست دے کر سیمی فائنل کے لیے کوالیفائی کرلیا۔
تفصیلات کے مطابق پاکستان نے افغانستان کو شکست دے کر انڈر 19 ورلڈ کپ کے سیمی فائنل میں رسائی حاصل کرلی، افغانستان کی ٹیم نے پہلے بیٹنگ کرتے ہوئے 189 رنز بنائے اور قومی ٹیم کو جیت کے لیے 190 رنز کا ہدف دیا، گرین شرٹس نے ہدف 4 وکٹوں کے نقصان پر حاصل کرلیا۔
پاکستان کے حریرا نے 64 رنز کی میچ وننگ اننگز کھیلی، کپتان روحیل نذیر 22 رنز بنا کر نمایاں رہے، اوپنر حیدر نے 28 رنز بنائے۔
قاسم اکرم 20 اور محمد حارث 21 رنز بنا کر ناٹ آؤٹ رہے، افغانستان کی جانب سے نور احمد نے 2 کھلاڑیوں کو پویلین کی راہ دکھائی۔
اس سے قبل افغانستان کی ٹیم 189 رنز پر ڈھیر ہوگئی تھی، افغانستان کے کپتان فرحان ذخیل 40 رنز بنا کر نمایاں رہے۔
Pakistan win! #PakistanFutureStars qualify for the semi-finals of #U19CWC #PAKvAFG | #U19CWC | #WeHaveWeWill https://t.co/MJZRQUbstc pic.twitter.com/eBFUmYoiYB
— Pakistan Cricket (@TheRealPCB) January 31, 2020
پاکستان بولرز نے شاندار کارکردگی کا مظاہرہ کیا، محمد عامر خان نے تین اور فہد منیر نے دو کھلاڑیوں کو پویلین کی راہ دکھائی۔
واضح رہے کہ پاکستان کا سیمی فائنل میں ٹاکرا روایتی حریف بھارت سے 4 فروری منگل کو ہوگا، یاد رہے کہ قومی ٹیم 2 مرتبہ انڈر 19 ورلڈ کپ جیت چکی ہے، قومی ٹیم نے ایک مرتبہ بھارت کے خلاف سرفراز احمد کی کپتانی میں ورلڈ کپ میں کامیابی حاصل کی تھی۔