کراچی: شہر قائد کے علاقے پی آئی بی کالونی میں زیر تعمیر گھر کی دیوار گر گئی، جس کی زد میں آ کر 4 بچوں سمیت 7 افراد زخمی ہو گئے۔
تفصیلات کے مطابق کراچی کے علاقے پی آئی بی کالونی میں پریس کوارٹر کے قریب سندھی پاڑا میں ایک زیر تعمیر گھر کی دیوار گرنے سے 7 افراد زخمی ہو گئے، زخمیوں میں 4 بچے بھی شامل ہیں۔
ریسکیو ذرایع نے بتایا کہ زخمیوں کو جناح اسپتال منتقل کر دیا گیا ہے، حادثے میں ایک 7 سالہ بچی علوینہ شدید زخمی ہو گئی ہے جسے اسٹیڈیم روڈ پر نجی اسپتال منتقل کیا گیا۔
رپورٹ کے مطابق سندھی پاڑا میں ایک گھر کی دوسری منزل پر تعمیرات جاری تھیں، زیر تعمیر دیوار پڑوس کے گھر پر جا گری۔
پولیس کا کہنا ہے کہ یہ واقعہ عمارت کی غیر قانونی تعمیر کی وجہ سے پیش آیا ہے، دوسری منزل پر بنائی جانے والی دیوار برابر کے گھر پر آ گری تھی، حادثے کے بعد ٹھیکے دار اور مزدور فرار ہو گئے ہیں۔
پولیس نے بتایا کہ واقعے میں ملوث بلڈر اور ٹھیکے دار کی گرفتاری کے لیے چھاپے مارے جا رہے ہیں۔
ادھر ایس بی سی اے کی ٹیم جائے وقوع کا معائنہ کرنے پہنچ گئی، سندھ بلڈنگ کنٹرول اتھارٹی نے حادثے سے متعلق مؤقف دیتے ہوئے کہا ہے کہ پی آئی بی میں عمارت نہیں بلکہ دوسری منزل کی دیوار گری ہے، 40 گز کے پرانے مکان میں دوسری منزل پر دیوار یں اٹھائی جا رہی تھیں، متاثرہ مکان نالے پر بنایا گیا ہے۔
نذیر شاہ کراچی میں اے آر وائی نیوز سے وابستہ سینئر صحافی اور کرائم رپورٹر ہیں، وہ 14 سال سے زائد عرصے سے اپنے شعبے میں مصروف عمل ہیں اور انویسٹیگیٹو نیوز بریکنگ میں مہارت رکھتے ہیں، اور کراچی کے جرائم اور پولیس نظام سے متعلق گہری سمجھ بوجھ کے حامل ہیں۔