ہڈرزفیلڈ: یونیورسٹی آف ہڈرز فیلڈ کے اسکول آف لا کے زیر اہتمام منعقدہ بین الاقوامی مقابلہ پاکستانی طالب علم نے اپنے نام کر لیا۔
تفصیلات کے مطابق برطانیہ میں یونی ورسٹی آف Huddersfield میں قانون کے شعبے کی جانب سے منعقدہ ایک انٹرنیشنل مقابلہ پاکستانی طالب علم راجہ عیسیٰ اللہ خان نے جیت لیا۔
لا مُوٹ میں دنیا کے مختلف ممالک سے طلبہ نے شرکت کی، جو پاکستانی طالب علم راجہ عیسی اللہ خان نے جیتا، اے آر وائی نیوز سے گفتگو کرتے ہوئے اُن کا کہنا تھا کہ اُنھیں فخر ہے کہ وہ پاکستان کا نام روشن کر پائے ہیں۔
راجہ عیسیٰ نے کہا دنیا بھر میں موجود پاکستانی طالب علم پاکستان کے سفیر ہیں، اگر محنت اور لگن سے کوئی بھی کوشش کی جائے تو کامیابی آپ کے قدم ضرور چومتی ہے۔
عیسیٰ کا آبائی تعلق گوجرانوالہ کی تحصیل وزیر آباد سے ہے، اُنھوں نے ابتدائی تعلیم لاہور سے حاصل کی اور 2018 میں ایل ایل بی کی ڈگری حاصل کرنے کے لیے برطانیہ آئے اور ہڈرزفیلڈ یونی ورسٹی میں زیر تعلیم ہیں۔
واضح رہے کہ قانون پڑھانے والے اداروں میں لا موٹ ایک نصابی سرگرمی ہے، جس میں طلبہ ایک مصنوعی عدالت یا ثالثی کی کارروائی میں حصہ لیتے ہیں، اور یادداشتوں کا مسودہ تیار کرتے ہیں اور زبانی دلائل میں بھی حصہ لیتے ہیں۔
