لندن: ہائیکورٹ نے مسلم جوڑوں کی غیر رجسٹرڈ شادی کو بے حیثیت قرار دے دیا ہے، اس فیصلے کے بعد برطانیہ میں مقیم مسلم جوڑوں میں تشویش کی لہر دوڑ گئی ہے۔
تفصیلات کے مطابق لندن ہائیکورٹ نے خلع کے مقدے میں اٹارنی جنرل کی اپیل پر فیصلہ سناتے ہوئے غیر رجسٹرڈ مسلم شادیوں کو بے حیثیت قرار دیا ہے۔
عدالت نے اس غیر معمولی فیصلے میں واضح کیا ہے کہ تمام شادیاں رجسٹرار کی موجودگی میں ہونی چاہیئں، وہ شادیاں اور نکاح جس میں رجسٹرار موجود نہ ہوں، ان کی ملکی قانون کے تحت کوئی حیثیت نہیں ہے۔
مسلم جوڑے کے خلع سے متعلق مقدمے میں لندن ہائیکورٹ نے 2018 میں قرار دیا کہ لوگوں کی موجودگی میں ہونے والی شادی قانونی ہے جس پر اٹارنی جنرل نے اپیل دائر کرتے ہوئے موقف اپنایا تھا کہ رجسٹرار کی غیر موجودگی میں ہونے والی شادی کو قانونی تصور نہیں کیا جا سکتا۔
عدالت نے اپیل پر سماعت کی اور دلائل سننے کے بعد فیصلہ سناتے ہوئے رجسٹرار کی غیر موجودگی میں ہونے والی شادیوں کو بے حیثیت قرار دے دیا۔
قابل ذکر بات یہ ہے کہ اپیل کی سماعتوں کے دوران کوئی بھی مسلم کمیونٹی کا نمائندہ یا وکیل شریک نہیں ہوا، اس نئے فیصلے کا اثر برطانیہ میں مقیم ان جوڑوں پر ہوگا جو شریعت کے مطابق شادی شدہ ہیں لیکن ملکی قوانین کے تحت انہوں نے رجسٹریشن نہیں کروائی۔
