اسلام آباد: وزیراعظم عمران خان نے قومی زبان اردو کی ترویج اور اسے فروغ دینے کے حوالے سے ایک انتہائی اہم اور بڑا فیصلہ کیا ہے۔
وزیراعظم کے معاونِ خصوصی برائے سیاسی ابلاغ شہباز گل نے سماجی رابطے کی ویب سائٹ پر جاری بیان میں بتایا کہ وزیراعظم عمران خان آئندہ تمام پروگراموں، تقاریب، کانفرنسز میں اردو زبان میں ہی تقریر کریں گے۔
انہوں نے لکھا کہ ’وزیراعظم کےاحکامات ہیں کہ آئندہ پروگرامز قومی زبان میں منعقد کیے جائیں، اب تمام پروگرامز، تقاریب، کانفرنس اردو زبان میں ہی منعقد کی جائیں گی‘۔
معاونِ خصوصی نے لکھا کہ قومی زبان ہمارا فخر ہے، جب دوسرے ممالک اپنی قومی زبان استعمال کرتےہیں توہم کیوں نہیں؟ وفاقی وزرا اور سرکاری افسران کو اردو زبان میں گفتگو اور احکامات جاری کرنے کی ہدایات جاری کی جائیں گی۔
وزرا اور سرکاری افسران کو بھی ہدایات جاری کی جائیں گی کہ اپنا پیغام تقاریر اپنی قومی زبان میں عوام تک پہنچائیں۔ ہماری عوام کی زیادہ تعداد انگریزی زبان نہیں سمجھتی۔عوام کی توہین مت کریں۔ وزیراعظم چاہتے ہیں جب بھی کوئی عوام سے جڑا پیغام یا تقاریر ہوں وہ ہماری قومی زبان اردو میں ہوں https://t.co/BxgA6dVodk pic.twitter.com/sMun3Rycrq
— Dr. Shahbaz GiLL (@SHABAZGIL) June 5, 2021
شہباز گل نے لکھا کہ ’حکومت تمام سرکاری اداروں کو ہدایت جاری کرے گی کہ اپنا پیغام قومی زبان میں ہی عوام تک پہنچائیں، عوام کی زیادہ تعداد انگریزی زبان میں جاری ہونے والے احکامات سمجھنے سے قاصر ہیں، لہذا عوام کی توہین نہ کریں‘۔
معاونِ خصوصی نے مزید لکھا کہ ’وزیراعظم چاہتے ہیں کوئی پیغام یا تقاریر ، احکامات قومی زبان میں جاری کیے جائیں۔