واشنگٹن : پاکستان اور افغانستان کےلیے امریکہ کے خصوصی نمائندے رچرڈ او لسن کا کہنا ہے کہ دہشت گردی کےخلاف پاکستان کا کردار قابل ستا ئش ہے لیکن مزیداقدامات کرنے کی ضرورت ہے۔
تفصیلات کے مطابق امریکی سینیٹ کمیٹی برائے خارجہ امور کے سامنے اپنے بیان میں رچرڈ اولسن نے کہا پاکستان دہشت گردوں کےخلاف موثرکارروائیاں کررہا ہے لیکن اسے دہشت گردوں کےخلاف بلاامتیاز کارروائیاں کرنا ہوگی۔
یہ بیان امریکی سینیٹ کی کمیٹی برائے خارجہ امور کے سامنے افغانستان پر ہونے والی ایک بحث کے دوران سامنے آیا۔
مزید پڑھیں:پاکستان دہشتگرد گروپوں کے خلاف بلاامتیاز کارروائی کرے، مارک ٹونر
سینیٹ کمیٹی برائے خارجہ امور میں بحث کے دوران کچھ سینیٹروں کی رائے تھی کہ پاکستان قابل اعتماد شراکت دار نہیں ہے اور حقانی نیٹ ورک کا ساتھ دے کر افغانستان میں امریکہ کے خلاف کام کر رہا ہے۔
رچرڈ اولسن کااس کے جواب میں کہنا تھا کہ اگر پاکستان ان تنظیموں کے خلاف کارروائی کرتا ہے تو اس سے خطے میں استحکام قائم ہو گا اور ہمسایہ ملکوں اور امریکہ کے ساتھ اس کے تعلقات بہتر ہوں گے۔
خیال رہے کہ گذشتہ مہینوں میں امریکی کانگریس میں پاکستان کے خلاف تلخی بڑھی ہے اور اس كا اثر ایف 16 طیاروں کی فروخت اور 30 کروڑ ڈالر کی امداد پر لگائی گئی پابندی کی صورت میں بھی سامنے آیا ہے۔
مزید پڑھیں:پاکستان افغان جنگ کے لیے اپنی سرزمین استعمال نہیں کرنے دے گا،ملیحہ لودھی
یاد رہےکہ بدھ کو اقوامِ متحدہ میں پاکستان کی سفیر مليحہ لودھی نے اپنے بیان میں کہا تھا کہ دنیا کو یہ توقع نہیں کرنی چاہیے کہ پاکستان افغانستان کی جنگ لڑے گا۔
واضح رہے کہ رچرڈ اولسن نے دہشت گردی کوجڑ سے اکھاڑپھیکنے کے حوالے آرمی چیف جنرل راحیل شریف کے بیان کا بھی خیرمقدم کیا۔
