پیانگ یانگ/واشنگٹن:شمالی کوریا کے نئے میزائل تجربے پرامریکی صدر نے کہاہے کہ تجربے سے کوئی بھی خوش نہیں ، امریکا نے شمالی کوریا کا جہاز قبضے میں لے لیا۔ دوسری جانب شمالی کوریا کے صدر کم جانگ ان نے اپنی فوج کو تیار رہنے کا حکم دیا ہے۔
تفصیلات کے مطابق امریکی محکمہ انصاف نے اعلان کیا ہے کہ اس نے شمالی کوریا کاکارگو جہاز اپنے قبضے میں لے لیا ہے، یہ عمل امریکا اور اقوام متحدہ کی جانب سے عائد کردہ پابندیوں کی خلاف ورزی پر کیا گیا۔
غیرملکی خبررساں ادارے کے مطابق امریکی صدر نے وائٹ ہاوس میں صحافیوں نے بات کرتے ہوئے کہا کہ شمالی کوریا امریکا کے ساتھ مذاکرات چاہتا ہے لیکن وہ اس کے لئے ابھی تیار نہیں ہے۔
ادھرجنوب کوریائی صدر کا کہنا تھاکہ شمالی کوریا کا حالیہ میزائل تجربہ ممکنہ طور پر اسکا امریکا سے اظہار ناراضی ہے۔واضح رہے کہ شمالی کوریا نے گزشتہ روزکم فاصلے تک مار کرنے والے دو میزائلوں کا تجربہ کیا ہے۔
دوسری جانب شمالی کوریائی لیڈر کم جونگ ان نے اپنے ملک کی فوج سے کہا ہے کہ اس کے لیے طاقتور حملے کی صلاحیت پیدا کرنا انتہائی ضروری ہے۔غیرملکی خبررساں ادارے کے مطابق شمالی کوریائی رہنما کا یہ تازہ بیان اس امریکی بیان کے جواب میں سامنے آ یاجس میں کہا گیا تھا کہ ایک ایسا مال بردار بحری جہاز قبضے میں لے لیا گیا ہے، جو شمالی کوریا کے لیے کوئلے کی غیرقانونی سپلائی کرتا تھا۔
شمالی کوریائی لیڈر کم جونگ ان نے ایک بیان میں کہاکہ انہوں نے مزید میزائل ٹیسٹ کرنے کا حکم بھی دے دیا ہے۔ کم جونگ ان نے ملکی افواج کو کسی بھی ہنگامی صورت حال کے لیے تیار رہنے کی خاطر جنگی مشقیں اور اہداف مکمل کرنے کی ہدایت بھی کی۔
