واشنگٹن: امریکا نے جرمنی میں مزید 1500 اہلکاروں کو تعینات کرنے کا فیصلہ کیا ہے، مزید امریکی فوجیوں کو 2020ء سے تعینات کیا جائے گا۔
غیرملکی خبررساں ادارے کے مطابق نئے یونٹس کی سرگرمیاں رواں سال سے ہی ترتیب دی جائیں گی اور 2020 میں اہلکاروں کو اہل خانہ سمیت جنوبی جرمنی میں تعینات کیا جائے گا۔
یوایس آرمی یورپ کے ہیڈ کوارٹر سے جاری ہونے والے بیان میں کہا گیا ہے کہ اضافی فوجی جرمنی میں پہلے سے موجود 33 ہزار اہلکاروں کے علاوہ ہوں گے جبکہ جرمنی میں نئے اہلکاروں کی مستقل تعیناتی نیٹو اور یورپی سیکیورٹی کے لیے ہمارے وعدے کی پاسداری کا ثبوت ہے۔
بیان میں کہا گیا ہے کہ یورپ میں تعینات امریکی فوجیوں میں اضافہ اس بات کی تصدیق ہے کہ ہم میں کسی بھی بحران سے نمٹنے کے لیے بہتر صلاحیتیں موجود ہیں۔
امریکی سفیر رچرڈ گرینل نے اپنے بیان میں کہا ہے کہ امریکا ٹرانس اٹلانٹک اتحاد کو مضبوط بنانے کے لیے پرعزم ہے۔
دوسری جانب جرمن وزیر دفاع ڈیئرلائن نے نئے فوجیوں کی تعیناتی کو خوش آئند قرار دیا ہے، ان کا کہنا تھا کہ امریکا کے اس اقدام دونوں ملکوں کے تعلقات مزید مستحکم ہوں گے۔
