The news is by your side.

Advertisement

امریکی قونصل جنرل کا پی آئی اے ہیڈ آفس کراچی کا دورہ، ایئر مارشل ارشد ملک سے ملاقات

کراچی : امریکہ کے قونصل جنرل روب سلبراسٹائن نے پی آئی اے ہیڈ آفس کراچی کا دورہ کیا اور پی آئی اے کے چیف ایگزیکٹو آفیسر ایئر مارشل ارشد ملک سے ملاقات کی۔

امریکی سفارتی وفد کو ائر مارشل ارشد ملک نے پی آئی اے کے آپریشنز، کارکردگی میں بہتری اور مستقبل کے بزنس پلان کے بارے میں آگاہ کیا۔

وفد کو خاص طور پر پی آئی اے کے فضائی بیڑے میں مزید طیاروں کی شمولیت اور نیویارک اور دوسرے امریکی شہروں کے لئے دوبارہ پروازیں شروع کرنے کے بارے میں بتایا گیا۔

انہوں نے کہا کہ نئے طیاروں کی شمولیت کے بعد پی آئی اے اپنے فضائی آپریشن کو وسعت دے گی۔ انہوں نے بتایا کہ ایندھن کی قیمتوں میں اضافے اور پاکستانی روپے کی قدر میں کمی کے باوجود ائر لائن کی کارکردگی میں بہتری کا عمل جاری ہے۔

امریکی قونصل جنرل روب سلبرا سٹائن نے پی آئی اے کی حالیہ کار کردگی کو سراہتے ہوئے اس امید کا اظہار کیا کہ پی آئی اے ایئر مارشل ارشد ملک کی قیادت میں اپنے اہداف کو حاصل کر لے گی۔

انہوں نے امریکی ادارے ٹی ایس اے سمیت متعلقہ محکموں سے رابطوں کے سلسلے میں اپنے بھر پور تعاون کا یقین دلایا۔ راب سلبر اسٹائن نے بالخصوص پی آئی اے کے سماجی بھلائی کے منصوبوں الشفا اور تعلیمی پروگرام میں دلچسپی ظاہر کرتے ہوئے تعریف کی۔

امریکی سفارتی وفد میں اکنامک کونسلر پیگی والکر، پولیٹیکل اکنامک سیکشن کے چیف جمی مالڈین کے علاوہ قونصل خانے کے سفارت کار اور پی آئی اے کے سینئر افسران بھی اس میٹنگ میں موجود تھے۔

Comments

comments

یہ بھی پڑھیں