واشنگٹن : امریکی وزارت دفاع کو نوجوانوں کے موٹاپے سے شدید تشویش لاحق ہوگئی ہے، جس کی وجہ یہ ہے کہ نئے فوجیوں کی بھرتی میں مشکلات پیدا ہورہی ہیں۔
تفصیلات کے مطابق امریکی تجزیہ کاروں نے کہا ہے کہ وزارت دفاع کو نیشنل سکیورٹی کے حوالے سے ایک بڑے خطرے کا سامنا ہے جس کی وجہ نئی نسل کا موٹا ہونا ہے کیونکہ آنے والے وقت میں پینٹاگون کو اس اہم مسئلے کے ساتھ نمٹنے میں شدید مشکلات کا سامنا ہو سکتا ہے۔
ایک نئی ریسرچ کے اعداد و شمار میں بتایا گیا ہے کہ امریکا کے نو جوانوں کی ایک تہائی تعداد موٹاپے کا شکار ہے، امریکی وزارت دفاع کے مطابق سترہ سے چوبیس برس کے ستر فیصد سے زائد امریکی نوجوان موٹاپے کے باعث فوج میں بھرتی کی بنیادی ضروریات پر پورا نہیں اترتے۔
مزید پڑھیں: امریکی فوج میں ٹرانس جینڈرز کی بھرتی پر پابندی عائد
امریکی نوجوانوں میں موٹاپا ایک وباء کی صورت اختیار کر چکا ہے اور یہ انتہائی تشویش کا باعث ہے، تجزیہ کاروں کا کہنا ہے کہ امریکی وزارت دفاع کو روس اور چین کی جانب سے انتہائی ہائی ٹیک عسکری چیلنجز کا یقینی طور پر سامنا ہے جس سے نمٹنے کیلئے مستقبل میں شدید مشکلات کا سامنا کرنا پڑسکتا ہے کیونکہ فوج میں بھرتیوں کیلئے ایسے نوجوانوں کی مطلوبہ تعداد موجود نہیں جو ایک کیڈٹ کے معیار پورا اترتے ہوں۔
