واشنگٹن (04 جنوری 2026): امریکا نے سعودی عرب کو F-15 طیاروں کے پرزہ جات فروخت کرنے کی منظوری دے دی۔
امریکی محکمہ دفاع پینٹاگون نے بتایا کہ 3 ارب ڈالرمالیت میں ممکنہ ڈیل طے ہوئی ہے، معاہدے کے تحت سعودیہ میں محدود تعداد میں امریکی شہری کنٹریکٹرز یا فوجی عملہ بھی طویل مدتی بنیادوں پر تعینات کیا جا سکتا ہے۔
تین روز قبل امریکا نے سعودی عرب کو پیٹریاٹ میزائلز فروخت کرنے کی بھی منظوری دی تھی، جس کی مجموعی مالیت تقریباً 9 ارب ڈالر ہے۔
العربیہ کے مطابق مملکتِ سعودی عرب نے درج ذیل دفاعی آلات خریدنے کی درخواست کی ہے: اسپیئر پارٹس اور مرمتی پرزہ جات، قابلِ استعمال سامان اور لوازمات، مرمت اور واپسی کی معاونت، زمینی اور عملے سے متعلق آلات، خفیہ اور غیر خفیہ سافٹ ویئر اور اس کی معاونت، خفیہ اور غیر خفیہ اشاعتی مواد اور تکنیکی دستاویزات، عملے کی تربیت اور تربیتی آلات، امریکی حکومت اور کنٹریکٹرز کی جانب سے انجینئرنگ، تکنیکی اور لاجسٹک معاونتی خدمات، نیز لاجسٹکس اور پروگرام سپورٹ سے متعلق دیگر ضروری عناصر۔
بگرام ایئر بیس لیں گے اور کسی کو نہیں دیں گے، ڈونلڈ ٹرمپ
بیان میں مزید کہا گیا کہ یہ فروخت امریکا کی خارجہ پالیسی اور قومی سلامتی کے مقاصد کو تقویت دے گی، کیوں کہ اس سے ایک ایسے بڑے غیر نیٹو اتحادی کی سلامتی بہتر ہوگی جو خلیجی خطے میں سیاسی استحکام اور معاشی ترقی کے لیے ایک مؤثر قوت سمجھا جاتا ہے۔
ایف۔15 جنگی طیارے سعودی عرب کی موجودہ اور مستقبل کی ممکنہ خطرات کو روکنے کی صلاحیت میں بھی اضافہ کریں گے۔ گزشتہ ہفتے کے آخر میں ٹرمپ انتظامیہ نے سعودی عرب کو 730 پیٹریاٹ ایڈوانسڈ کیپیبلٹی-3 میزائل سیگمنٹ انہانسمنٹ (PAC-3 MSE) میزائلوں کی ممکنہ 9 ارب ڈالر کی فروخت کی بھی منظوری دی تھی۔
پینٹاگون کے مطابق یہ بہتر دفاعی صلاحیت سعودی عرب، امریکا اور مقامی اتحادیوں کی زمینی افواج کو تحفظ فراہم کرے گی اور سینٹ کام کے خطے میں مربوط فضائی اور میزائل دفاعی نظام (IAMD) میں سعودی عرب کے کردار کو نمایاں طور پر مضبوط کرے گی۔
اے آر وائی نیوز کی ڈیجیٹل ڈیسک کی جانب سے شائع کی گئی خبریں