The news is by your side.

Advertisement

اردو زبان پر مہارت رکھنے والی خاتون امریکی سفارت خانے کی ترجمان مقرر

اسلام آباد / کراچی: امریکا نے پاکستان سے تعلقات کو مزید بہتر بنانے کے لیے ایسی خاتون کو سفارت خانے کا ترجمان مقرر کیا ہے جو اردو زبان پر عبور رکھتی ہیں اور قومی زبان میں ہی بات کرنے کو ترجیح دیتی ہیں۔

تفصیلات کے مطابق امریکی وزارت خارجہ کی جانب سے پاکستان کے ساتھ تعلقات کو مضبوط اور مستحکم بنانے کے لیے ایک احسن اقدام اٹھایا گیا جسے جان کر آپ بھی خوش ہوجائیں گے۔

امریکا نے پاکستانی سفارت خانے میں خاتون عہدیدار ’ہیلینا وائٹ’ کو بطور ترجمان مقرر کیا، جن کی خاصیت ہے کہ وہ اردو زبان پر  نہ صرف عبور رکھتی ہیں بلکہ پاکستانیوں کی طرح فر فر اردو بولتی بھی ہیں‘۔ امریکی وزارت خارجہ کا کہنا ہے کہ ترجمان کی تقرری کا مقصد پاکستان اور امریکا کے تعلقات کو مزید مضبوط بنانا ہے۔

امریکی سفارت خانے کی نو مقرر ترجمان کا کہنا ہے کہ ’اردو دنیا کی میٹھی زبان ہے جس کا لطف بیان کرنا آسان نہیں، اس زبان نے قابل ذکر خدمات انجام دیں اور جنوبی ایشیا میں بسنے والے لوگوں کی خاصی بڑی تعداد اردو زبان میں بات چیت کرتی ہے‘۔

اُن کا کہنا تھا کہ ’میں اردو کی بدولت ہی پاک امریکا تعلقات کو مزید قریب لاتے ہوئے تعلقات کو مزید مضبوط بنا سکتی ہوں، مسلم دنیا خاص طور پر پاکستان سے وائٹ ہاؤس انتظامیہ کے تعلقات بہت گہرے اور خوشگوار ہیں اور ہماری خواہش ہے کہ وقت کے ساتھ ساتھ یہ مزید مضبوط ہوں‘۔

ہیلنا کا کہنا تھا کہ ’وائٹ ہاؤس انتظامیہ سمجھتی ہے کہ جنوبی ایشیاء سے متعلق امریکی پالیسیوں کو پاکستان پر واضح کرنے کے لیے اردو زبان بولنے اور سمجھنے والے ترجمان کی تقرری بے حد ضروری تھی‘۔

اُن کا کہنا تھا کہ ’اردو سیکھنا اور بولنا میرا شوق تھا جس میں طویل عرصے بعد مہارت حاصل ہوئی، صرف زبان ہی نہیں بلکہ ادب اور شاعری پڑھنے کے لیے بھی یونیورسٹی میں ثقافت کا مضمون پڑھا تاکہ اردو سمجھنے والوں کے ساتھ بہتر انداز میں ہم کلام ہوسکوں‘۔ امریکی سفارت خانے میں تعینات ہونے والی خاتون کا کہنا تھا کہ ’اردو ترجمانی کی تعیناتی کے بعد میرا دیرینہ خواب پورا ہوگیا جس کی مجھے بہت خوشی ہے‘۔

واضح رہے کہ گذشتہ برس ہیلنا نے بھارت کے مختلف علاقوں کا دورہ بھی کیا تھا، نئی دہلی میں موجود سفارت خانے کی جانب سے خاتون عہدیدار کی ویڈیو جاری کی گئی تھی جس میں اُن کی اردو بولنے اور سمجھنے کی مہارت کو دیکھا جاسکتا ہے۔

خیال رہے کہ ہیلنا وائٹ لندن میں واقع امریکی سفارت خانے میں بھی امور سرانجام دے چکی جبکہ وہ پاکستان اور افغانستان کے لیے بطور نمائندہ خصوصی بھی ذمہ داریاں سرانجام دے چکی ہیں۔


خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں۔

Comments

comments

یہ بھی پڑھیں