واشنگٹن: امریکی وزیر خارجہ مائیک پومپیو کا رواں سال ستمبر میں دورہ پاکستان کا امکان ہے، اپنے دورے میں وہ نومنتخب وزیر اعظم عمران خان سے ملاقات کریں گے۔
تفصیلات کے مطابق نومنتخب وزیر اعظم عمران خان اور چیف آف آرمی اسٹاف جنرل قمر جاوید باجوہ سے ملاقات کے لیے امریکی وزیر خارجہ مائیک پومپیو پاکستان کا دورہ کریں گے۔
امریکی میڈیا کے مطابق مائیک پومپیو کا ستمبر کے پہلے ہفتے میں دورہ پاکستان متوقع ہے، ایلس ویلز بھی امریکی وزیر خارجہ کے ہمراہ پاکستان آئیں گی۔
امریکی میڈیا کا یہ بھی کہنا تھا کہ مائیک پومپیو وزیراعظم عمران خان اور آرمی چیف سے جنرل قمر جاوید باجوہ سے خصوصی ملاقات کریں گے۔
وزیرِ اعظم عمران خان کو سری لنکا کے وزیرِ اعظم کا ٹیلی فون
قبل ازیں سری لنکن وزیرِ اعظم نے فون کر کے وزیرِ اعظم عمران خان کو مبارک باد دی، عمران خان نے سری لنکا کے وزیرِ اعظم کا شکریہ ادا کیا۔
سری لنکن وزیرِ اعظم وکرما سنگھا کا ٹیلی فونک گفتگو کے دوران کہنا تھا کہ دو طرفہ تعلقات میں اضافے کے لیے مل کر کام کرنا وقت کی اہم ضرورت ہے۔
بعد ازاں وزیرِ اعظم عمران خان کا کہنا تھا کہ پاکستان اور سری لنکا کے درمیان گہرے اور دوستانہ تعلقات استوار ہیں، ان تعلقات میں اضافے کے لیے کام کیا جائے گا۔
واضح رہے کہ آج قوم سے اپنے پہلے خطاب میں وزیرِ اعظم عمران خان نے معیشت اور سیاحت کے شعبوں کی بہتری کے لیے واضح اور بڑے اقدامات کرنے کا اعلان کیا ہے۔
