The news is by your side.

Advertisement

افغانستان میں جنگ بندی میں کمی پر پاکستان کا کردار اہم ہے: امریکی محکمہ خارجہ

واشنگٹن: امریکی محکمہ خارجہ نے کہا ہے کہ افغانستان میں جنگ بندی اور تشدد میں کمی پر پاکستان کا کردار اہم ہے، اس سلسلے میں زلمے خلیل زاد نے دورہ کر کے پاکستان کی کوششوں کا خیر مقدم کیا۔

تفصیلات کے مطابق امریکی محکمہ خارجہ نے افغانستان کے لیے خصوصی سفیر زلمے خلیل زاد کے دورۂ پاکستان پر اعلامیہ جاری کرتے ہوئے کہا ہے کہ پاکستان کو طالبان کے ساتھ ہونے والے مذاکرات میں پیش رفت سے متعلق آگاہ کیا گیا ہے۔

اعلامیے میں کہا گیا کہ انٹرا افغان مذاکرات اور خطے میں امن کے لیے پاکستان کی کوششیں اہم ہیں، خطے میں بہتر سیکورٹی اور معیشت امن کے لیے مدد گار ثابت ہو سکتی ہے، امریکی سفیر زلمے خلیل زاد نے اس سلسلے میں امن کے حوالے سے پاکستان کی کوششوں کا خیر مقدم کیا۔

تازہ ترین:  بگرام ایئربیس پر حملہ: امریکا اور طالبان کے مذاکرات پھر تعطل کا شکار

خیال رہے کہ گزشتہ روز افغانستان کے لیے خصوصی امریکی سفیر زلمے خلیل زاد نے اسلام آباد کا دورہ کیا تھا، انھوں نے پاکستان میں وزیر خارجہ شاہ محمود قریشی اور آرمی چیف جنرل قمر جاوید باجوہ اور پاکستانی حکومتی اراکین سے ملاقاتیں کیں۔

ادھر امریکا نے تین دن قبل امریکی فضائیہ کے زیر استعمال بگرام ہوائی اڈے پر حملے کے بعد طالبان کے ساتھ امن مذاکرات ایک بار پھر ملتوی کر دیے ہیں، طالبان اس حملے کی ذمہ داری قبول کر چکے ہیں، حملے میں دو افراد ہلاک جب کہ درجنوں زخمی ہوئے۔

زلمے خلیل زاد نے ایک ٹویٹ میں کہا کہ طالبان کے ساتھ ملاقات میں انھوں نے اس حملے پر شدید مذمت کرتے ہوئے کہا تھا کہ طالبان کو بہر صورت دکھانا ہوگا کہ وہ افغانستان میں امن کے خواہاں ہیں۔

Comments

comments

یہ بھی پڑھیں