واشنگٹن : امریکی صدر براک اوباما کا کہنا ہے افغانستان کے مسئلےکاحل افغان حکومت اورطالبان میں مذاکرات ہیں، افغانستان کوداعش کی پناہ گاہ بننے نہیں دیں گے۔
واشنگٹن سے جاری بیان میں امریکی صدر کا کہنا تھا کہ افغانستان میں نتائج حاصل کر لئے تاہم سیکیورٹی کی صورتحال اب بھی نازک ہے، انہوں نے کہا افغان افواج کی جنگی تربیت کررہے ہیں۔
براک اوباما نے کہا کہ اگلے برس جب وہ اپنے عہدہ صدارت کی دوسری مدت پوری کر کے وائٹ ہاؤس سے رخصت ہو رہے ہوں گے، تو افغانستان میں امریکی فوجیوں کی تعداد آٹھ ہزار چار سو کے قریب ہو گی، فوجیوں کی تعداد سال کے آخر تک کم کردی جائے گی۔
انہوں نے مزید کہا کہ افغانستان سے فوجیوں کی واپسی کا فیصلہ نئے امریکی صدرکریں گے۔
اوباما کا کہنا تھا کہ افغانستان میں امن و سلامتی امریکا میں امن و سلامتی کیلئے ناگزیر ہے، افغان امن عمل کی حمایت جاری رکھیں گے، مسئلے کا اصل حل افغانستان اور طالبان کے درمیان مذاکرات میں ہیں۔