واشنگٹن: امریکی صدر ڈونلڈ ٹرمپ نے ایس او پیز پر عمل کرتے ہوئے کرونا وائرس کی مہلک وبا کے دوران پہلی بار ماسک پہن لیا۔
امریکی میڈیا کے مطابق صدر ڈونلڈ ٹرمپ نے آخرکار ماسک پہن لیا، صدر ٹرمپ پہلی بار واشنگٹن میں ملٹری میڈیکل سینٹر کے دورے کے دوران ماسک پہنے نظر آئے۔امریکی صدر ٹرمپ جو پبلک مقامات پر بھی ماسک پہننے سے مسلسل گریز کر رہے تھے، ہفتے کے روز ماسک پہننے کے بعد کہنے لگے کہ ماسک پہننا اچھی بات ہے۔
ٹرمپ نے گزشتہ روز واشنگٹن سے باہر بیتھسڈا کے علاقے میں واقع فوجی طبی ادارے میں زخمی فوجیوں اور فرنٹ لائن ہیلتھ کیئر ورکرز کی عیادت کی۔ ٹرمپ نے اس سے قبل پبلک مقامات میں فیس ماسک پہننے سے انکار کیا تھا اور انھوں نے دوسرے امریکیوں کو بھی ماسک پہننے کی ترغیب نہیں دی۔
ٹرمپ نے غیر ملکیوں کو شہریت دینے کا عندیہ دے دیا
امریکی صدر کا وبا کے دوران ماسک پہننے سے متعلق یہ مؤقف تا کہ اس کا انحصار ذاتی پسند یا فیصلے پر ہے، اگر کوئی پہننا چاہیے تو پہنے، نہ پہننا چاہے تو نہ پہنے۔ ٹرمپ نے یہ بھی کہا تھا کہ اگر وہ زیادہ گہماگہمی والی جگہ پر جائیں گے تو ماسک پہن لیں گے۔
انھوں نے اسپتال کے دورے سے قبل وائٹ ہاؤس میں رپورٹرز سے ماسک کے سلسلے میں تفصیلی بات کرتے ہوئے کہا کہ جب آپ اسپتال میں ہوں، خاص طور پر ایک مخصوص جگہ، جہاں آپ فوجیوں سے مل رہے ہوں، اور ان سے جو آپریشن ٹیبل سے اٹھے ہوں تو میرے خیال میں ماسک پہننا ایک بہت اچھا عمل ہے۔
طبی مرکز کے دورے کے موقع پر ڈونلڈ ٹرمپ نے نیلے رنگ کا ماسک پہنا، جس پر سونے کے تاروں سے صدارتی مہر منقش کی گئی تھی۔
واضح رہے کہ ماہرین صحت بار بار کہہ رہے ہیں کہ ماسک کے ذریعے کرونا وائرس کے پھیلاؤ میں کمی لائی جا سکتی ہے، دوسری طرف امریکی صدر کے انکار پر تنقید کرتے ہوئے کہا گیا تھا کہ یہ انکار دراصل لیڈر شپ کے فقدان کو ظاہر کرتا ہے۔
امریکا میں کرونا وائرس انفیکشن سے اب تک 137,403 افراد ہلاک ہو چکے ہیں جب کہ وائرس سے متاثر ہونے والے افراد کی تعداد 33 لاکھ 55 ہزار سے بڑھ گئی ہے۔
