واشنگٹن: امریکی صدر کے لیے جدید ترین ٹیکنالوجیز سے آراستہ ایک سپر سانک ہوائی جہاز تیار کیا جا رہا ہے، جو آواز سے دگنی رفتار سے اڑے گا۔
تفصیلات کے مطابق ریاست کیلیفورنیا کی ایک کمپنی ایگزوسانک امریکی فضائیہ کے ساتھ مل کر ایسے سپر سانک ہوائی جہاز پر کام کر رہی ہے، جو اگلا ایئر فورس وَن ہو سکتا ہے۔
ایگزوسانک نامی کمپنی کو یہ کام تب سونپا گیا تھا جب اس کے لو-بوم سپر سانک ماک 1.8 ٹوئن جیٹ نے امریکی فوج کو کافی متاثر کیا۔
یہ طیارہ 31 نشستوں کا حامل ہوگا، جو ایگزوسانک کے کمرشل ایئر لائن جیٹ کی بنیاد پر بنایا جائے گا، اور اسے بزنس جیٹ جہازوں کا عروج کہا جا رہا ہے، جس میں چمڑے کی نشستیں، نفیس لکڑی اور سنگ چینی کا کام اور آرام اور کام کے لیے علیحدہ مقامات اور سب سے بڑھ کر یہ کہ اس کی زیادہ سے زیادہ رفتار موجودہ ہوائی جہازوں سے دو گنی ہوگی۔
اس جہاز کے ڈیزائن میں میں دو نجی حصوں میں سے پہلا حصہ تین مسافروں کے لیے میٹنگ رُوم کی صورت میں ہے، جس میں محفوظ وڈیو ٹیلی کانفرنس کی سہولت ہوگی تاکہ کام کے لیے آن لائن ہونے اور صحافیوں سے گفتگو کی سہولت ملے، یہاں چمڑے کی گھومنے والی نشستیں ہیں اور وڈیو مانیٹر کو بھی تہہ کر کے بند کیا جا سکتا ہے۔ دوسرے حصے میں سیدھی نشستیں ہیں جن کے ساتھ موجود کرسی کو اپنی مرضی کی اونچائی پر رکھا جا سکتا ہے، یہاں سینئر عملہ مل کر کام یا آرام کر سکتا ہے، اور مین کیبن میں 20 بزنس کلاس نشستیں ہیں۔
ایگزو سانک کا یہ ہوائی جہاز 5 ہزار بحری میل یعنی 9,260 کلومیٹرز کی رینج رکھتا ہے اور آواز سے تقریباً دو گنی رفتار کی صلاحیت بھی، اس کی خاص بات یہ ہے کہ اس کی لو-بوم ٹیکنالوجی زمین پر رہنے والے لوگوں کو متاثر نہیں کرتی، عموماً سپر سانک ہوائی جہازوں سے بہت زیادہ آواز پیدا ہوتی ہے، جس سے لوگ بہت پریشان ہوتے ہیں۔
اس جہاز کی زیادہ سے زیادہ رفتار ماک 1.8 یعنی 2,222 کلومیٹرز فی گھنٹہ ہوگی، کمپنی کا کہنا ہے کہ یہ جہاز 2030 کی دہائی کے وسط تک فضاؤں میں پرواز کرے گا۔
واضح رہے کہ اٹلانٹا میں قائم ہرمیوس کارپوریشن بھی 20 نشستوں والا ایک ہائپر سانک طیارے پر کام کر رہی ہے، یہ سپر سانک نہیں بلکہ ہائپر سانک ہوگا جو صرف 90 منٹ میں نیو یارک سے لندن پہنچے گا۔ ہرمیوس امریکی فضائیہ اور ناسا سمیت مختلف اداروں کے ساتھ ملک کر ایک ماک 5 جہاز بنانے کے لیے بھی کام کر رہا ہے، یعنی آواز کی رفتار سے 5 گُنا رفتار پر اڑنے والا طیارہ۔
