واشنگٹن: امریکا نے فلسطین کے لیے امداد بحال کرنے کا اعلان کردیا۔
غیرملکی خبررساں ادارے کی رپورٹ کے مطابق جوبائیڈن انتظامیہ کا فلسطینیوں کو ساڑھے 23 کروڑ ڈالر امداد دینے کا منصوبہ ہے، جوبائیڈن نے فلطسین کو 235 ملین ڈالر امداد جاری کرنے کا فیصلہ کیا۔
اقوام متحدہ کے ترجمان کا کہنا ہے کہ دوسرے ممالک سے بھی ایسے اقدامات کی امید ہے۔
امریکی امدادی پیکیج زیادہ تر اقوام متحدہ کی ریلیف ایجنسی یو این ڈبلیو آر اے کے ذریعے فراہم کیا جائے گا اور اسٹیٹ ڈپارٹمنٹ کی جانب سے اس کا اعلان جلد کیا جائے گا۔
واضح رہے کہ فلسطین کی امداد سابق امریکی صدر ٹرمپ کے دور میں روکی گئی تھی۔
جوبائیڈن نے اس سے قبل واضح کیا تھا کہ وہ فلسطینیوں کے حوالے سے سابق صدر کی جانب سے کیے گئے تمام فیصلوں کو واپس لیں گے۔
جوبائیڈن کے ساتھیوں نے بھی واضح کیا تھا کہ وہ اسرائیل اورفلسطین کے مسئلے میں دو ریاستی حل کے حق میں ہیں اور چاہتے ہیں کہ مذاکرات سے یہ مقصد حاصل ہو۔
امریکہ کی نئی انتظامیہ پہلے ہی واشنگٹن میں قائم فلسطینی سفارتی مشن کی بحالی، لاکھوں ڈالر کی معاشی اور انسانی بنیادوں پر تعاون کا اعادہ کیا تھا۔
