دوحہ: قطری دارالحکومت میں امریکا اور طالبان رہنماؤں کے درمیان ہونے والے مذاکرات کا چھٹا دور اختتام پذیر ہوگیا۔
تفصیلات کے مطابق طالبان اور امریکا کے درمیان مذاکرات کا چھٹا مرحلہ اختتام پذیر ہوگیا، اس دوران سابقہ مذاکرات میں مرتب ہونے والے مسودے پر بحث ہوئی۔
غیر ملکی خبررساں ادارے کا کہنا ہے کہ جمعرات کو قطر کے دارالحکومت دوحہ شہر میں طالبان کے نمائندوں اور امریکی مذاکرات ٹیم کے درمیان مذاکرات کو مثبت قرار دیا جارہا ہے۔
طالبان کے مطابق اس مرحلے میں سابقہ مذاکرات میں مرتب ہونے والے مسودہ پر بحث ہوئی، بعض امور میں پیش رفت ہوئی اور چند تاحال باقی ہے۔
آئندہ مذاکراتی اجلاس میں دیگر امور پر بھی بحث ہوگی، طالبان ترجمان سہیل شاہین نے ٹویٹر پر کہا کہ مذاکرات کا چھٹا مرحلہ مجموعی طور پر مثبت رہا۔ فریقین نے ایک دوسرے کے موقف کو بغور سنا۔
انہوں نے کہا کل اب جانبین دوسرے مرحلے تک مربوطہ موضوعات اور پیش رفت کے متعلق غور اور مشورہ کریں گے اور آنے والے مرحلے کے لیے آمادگی کریں گے۔
غیر ملکی خبر رساں ادارے کے مطابق طالبان نے عندیہ دیا ہے کہ امریکا کے ساتھ مذاکرات میں اختلافات کم ہورہے ہیں، غیر ملکی فوجی انخلا پر بھی بات جیت جاری ہے۔
طالبان نے امریکا سے مذاکرات میں پیش رفت کا عندیہ دے دیا
یاد رہے کہ گذشتہ ہفتے طالبان کی جانب سے جاری کردہ بیان میں کہا گیا تھا کہ امریکی نمائندہ خصوصی زلمے خلیل زاد کے سامنے تجاویز رکھی گئی ہیں جس پر تبادلہ خیال ہوا تاہم کوئی بھی فیصلے کو حتمی شکل دینے کے لیے مزید ملاقاتیں درکار ہوں گی۔
