واشنگٹن: امریکی صدر ڈونلڈ ٹرمپ نے عالمی ادارہ صحت (WHO) کو سالانہ فراہم کیا جانے والا 500 ملین ڈالرز کا فنڈ رکوا دیا۔
غیر ملکی میڈیا کے مطابق امریکی صدر نے وائٹ ہاؤس میں پریس کانفرنس کرتے ہوئے بتایا کہ انھوں نے انتظامیہ کو ڈبلیو ایچ او کے فنڈز روکنے کی ہدایت کر دی ہے، امریکا عالمی ادارہ صحت کو پانچ سو ملین ڈالرز سالانہ فراہم کر رہا تھا۔
ڈونلڈ ٹرمپ نے کرونا کے پھیلاؤ کا تمام تر ذمہ دار ڈبلیو ایچ او کو قرار دیتے ہوئے کہا کہ ادارہ صحت کی فنڈنگ گزشتہ انتظامیہ کو ہی روک دینی چاہیے تھی، ڈبلیو ایچ او نے کرونا کے معاملے پر صحیح کردار ادا نہیں کیا، ادارے کی گائیڈ لائنز پر عمل کرنے سے ہی کئی ملکوں میں وائرس پھیلا، عالمی ادارہ کرونا کے حوالے سے وقت پر اطلاع دینے میں ناکام رہا۔
کرونا کی عالمگیر وبا نے 20 لاکھ سے زائد انسانوں کو لپیٹ میں لے لیا
امریکی صدر نے الزامات کی بوچھاڑ کرتے ہوئے کہا کہ عالمی ادارہ صحت نے کرونا وائرس کے معاملے پر تاخیر سے کام لیا، جس پر اس کا احتساب ہونا ضروری ہے، ڈبلیو ایچ او نے سائنس دانوں اور محققین کی گم شدگی پر بھی خاموشی اختیار کیے رکھی، عالمی ادارہ وقت پر فیصلے کرتا تو وبا پر قابو پایا جا سکتا تھا، ادارے نے دنیا کو غلط معلومات فراہم کیں۔
ڈونلڈ ٹرمپ نے کہا کہ عالمی ادارہ صحت کو اصلاحات لانے کی ضرورت ہے۔ خیال رہے کہ 11 مارچ کو عالمی ادارہ صحت کی جانب سے کرونا وائرس کو عالمی وبا قرار دیا گیا تھا جب کہ اس سے قبل وائرس نے چین سے نکل کر 13 گناہ تیزی سے ساری دنیا کو اپنی لپیٹ میں لینا شروع کر دیا تھا۔
