امریکا کا ایران کے بعد روس پر نئی پابندیاں لگانے کا اعلان
The news is by your side.

Advertisement

امریکا کا ایران کے بعد روس پر نئی پابندیاں لگانے کا اعلان

واشنگٹن : امریکا نے روس پرنئی پابندیاں لگانے کا اعلان کیا ہے، پابندیاں برطانیہ میں سابق روسی جاسوس اوران کی بیٹی پرکیمیکل حملے میں روس کے ملوث ہونے پرعائد کی جارہی ہیں۔

تفصیلات کے مطابق امریکی محکمہ خارجہ کی ترجمان ہیدرنوئرٹ نے بیان میں روس پر نئی پابندیاں لگانے کا اعلان کرتے ہوئے کہا کہ یہ بات سامنے آئی ہے کہ روس نے اپنے ہی شہریوں کے خلاف کیمیکل یا بائیولوجیکل ہتھیار کا استعمال کیا، جو بین الاقوامی قوانین کی خلاف ورزی ہے۔

ترجمان کا کہنا تھا کہ روس پر نئی پابندیوں کا اطلاق بائیس اگست سے ہوگا، اطلاق کے بعد روس حساس الیکٹرانک آلات اور دیگر ٹیکنالوجی کو درآمد نہیں کرسکتا ہے۔

برطانوی حکومت نے روس کے خلاف امریکہ کی اقدامات کا خیر مقدم کیا ہے۔

دوسری جانب روسی سفارت خانے نے امریکہ کی جانب سے لگائی جانے والی پابندیوں پر تنقید کرتے ہوئے ظالمانہ قرار دیا ہے اور کہا اس حملے میں روس کو ملوث کرنے کے الزامات ‘مبالغہ آرائی’ پر مبنی ہیں۔


مزید پڑھیں : سابق روسی جاسوس پر حملے میں روسی شہری ملوث تھے، برطانوی پولیس


یاد رہے کہ جولائی میں برطانیہ کے علاقے سالسبری میں سابق روسی جاسوس سرگی اسکرپل اوران کی بیٹی کوکیمیکل حملے کا نشانہ بنایا گیا تھا جبکہ برطانیہ نے حملے کی ذمہ داری روس پرعائد کی تھی۔

زہریلی گیس کے واقعے کے بعد روس اور برطانیہ کے درمیان کشیدگی میں اضافہ ہوتا چلا گیا تھا، دونوں ممالک نے ایک دوسرے کو سفارتکاروں کو ملک بدر کردیا تھا، جبکہ امریکا سمیت کئی یورپی ممالک نے روس کے کئی سفارتکاروں کو ملک چھوڑنے کا حکم دیا تھا۔

خیال رہے دو روز قبل ہی امریکہ کی جانب سے ایران پر پابندیاں عائد کی گئی تھی جبکہ 5 نومبر کو توانائی اور تیل کی صنعتوں پر پابندیاں لگائی جائیں گی۔

امریکی صدرڈونلڈ ٹرمپ نے ایران پراقتصادی پابندیاں عائد کرنے کے بعد ایران سے کاروبار کرنے والے ممالک پرامریکہ سے تجارت کرنے پر پابندی کی دھمکی دی تھی۔

ٹرمپ کا کہنا تھا یہ ایران پر اب تک لگائی گئی سب سے سخت پابندیاں ہیں، نومبرمیں ان پابندیوں کو مزید سخت کیا جائے گا۔

Comments

comments

یہ بھی پڑھیں