The news is by your side.

Advertisement

امریکی ویزا کے لیے شرائط مزید سخت کردی گئیں

واشنگٹن: امریکی ویزوں کے خواہش مند افراد کو اب درخواست کے ساتھ اپنے سوشل میڈیا اکاؤنٹ کی تفصیلات بھی فراہم کرنا ہوں گی۔

امریکی اسٹیٹ ڈیپارٹمنٹ کے مطابق امریکی ویزوں کے خواہش مند درخواست گزاروں کو سوشل میڈیا پر موجود اپنے نام اور پانچ برسوں میں استعمال کردہ ای میل ایڈریس اور فون نمبرز بھی جمع کرانا ہوں گے۔

امریکی محکمہ خارجہ کے مطابق سفارتی اور سرکاری ویزا کے لیے درخواست جمع کرانے والوں کو یہ تفصیلات جمع نہیں کرانا ہوں گی۔

نئے قوانین کے تحت سوشل میڈیا اکاؤنٹس سے متعلق جھوٹ بولنے والوں کو سنگین امیگریشن نتائج کا سامنا کرنا پڑسکتا ہے۔

امریکی اسٹیٹ ڈیپارٹمنٹ کا کہنا ہے کہ اقدامات کا مقصد اسکریننگ کے عمل کو بہتر کرنا اور امریکی شہریوں کی حفاظت یقینی بنانا ہے۔

مزید پڑھیں: امریکی حکومت نے ویزا شرائط مزید سخت کرنے کی تیاری کرلی

نئے قوانین کے اطلاق سے قبل گزشتہ برس تخمینہ لگایا گیا تھا کہ اس اقدام سے ایک کروڑ 40 لاکھ سے زائد افراد متاثر ہوں گے۔

واضح رہے کہ اس سے قبل یہ تمام معلومات ان افراد کو فراہم کرنا پڑتی تھیں جہاں دہشت گرد تنظیمیں سرگرم تھیں تاہم اب ہر درخواست گزار کو سوشل میڈیا پلیٹ فارم میں درج اپنے اکاؤنٹس کی معلومات فراہم کرنا ہوں گی۔

یاد رہے کہ امریکا آنے والے مسافروں کے سوشل میڈیا اکاؤنٹس کی معلومات سے متعلق سفارشات گزشتہ برس مارچ میں پیش کی گئی تھیں تاہم اس وقت شہری حقوق کے لیے کام کرنے والے گروپ کا کہنا تھا کہ اس بات کا کوئی ثبوت نہیں ہے کہ سوشل میڈیا مانیٹرنگ فائدہ مند ثابت ہوگی۔

Comments

comments

یہ بھی پڑھیں