واشنگٹن : امریکا نے افغان امن عمل سے ہاتھ اٹھالیے ، امریکی محکمہ خارجہ کی ترجمان نیڈپرائس کا کہنا ہے کہ افغان مذاکرات میں امریکا فریق نہیں ہے، سیاسی حل ہی افغانستان میں امن کاراستہ ہے۔
تفصیلات کے مطابق واشنگٹن میں امریکی محکمہ خارجہ کے ترجمان نیڈ پرائس نے پریس کانفرنس کرتے ہوئے کہا افغان تنازع کاکوئی فوجی حل نہیں،سیاسی حل ہی امن کا راستہ ہے، افغان مذاکرات میں امریکا فریق نہیں،معاون کاکرداراداکیا۔
امریکی محکمہ خارجہ کا کہنا تھا کہ بندوق کے زور پرحکومت کرنے والوں کو عالمی حمایت حاصل نہیں ہوگی ، طالبان، افغان حکومت میں تصفیہ ہی امن کا واحدراستہ ہے، دنیا افغانستان میں زبردستی کی حکومت قبول نہیں کرے گی۔
نیڈ پرائس کا کہنا تھا کہ طالبان کی جانب سے جاری پُرتشدد کارروائیاں بند ہونی چاہئیں، بندوق کی زورپرآنےوالی حکومت کوعوامی حمایت حاصل نہیں ہوگی تاہم انخلا کے بعد بھی افغان عوام سے شراکت داری جاری رہے گی۔
ترجمان محکمہ خارجہ نے کہا کہ کابل میں ایک سفارتی احاطے کو برقرار رکھیں گے، سفارت کاروں کی سیکیورٹی کیلئے فوجی موجودرہیں گے، دنیا بھر کے سیکیورٹی معاملات پر ہماری گہری نظر ہے۔
