بغداد: عراقی سیکیورٹی ایڈوائزر نے کہا ہے کہ امریکا نے اتحادیوں کے ساتھ عراق میں جنگی مشن ختم کر دیا ہے۔
غیر ملکی میڈیا کے مطابق عراق کے سلامتی مشیر کی جانب سے امریکا اور اس کے اتحادیوں کے مشن ختم کر کے انخلا کرنے کا بیان سامنے آیا ہے۔
لیکن کیا امریکا اور اتحادیوں نے واقعی عراق سے بھی انخلا کر لیا ہے؟ اگرچہ سلامتی مشیر نے تو کہا ہے کہ امریکا اور اتحادی فورسز نے ملک سے انخلا کر لیا ہے، تاہم امریکا کی جانب سے عراق سے انخلا کی کوئی تصدیق نہیں ہوئی ہے۔
واضح رہے کہ امریکا اور اتحادی فورسز عراق میں داعش کے خلاف کارروائی کر رہی تھیں۔
ادھر عراقی سیکیورٹی حکام نے کہا ہے کہ بدھ کے روز حکومت نے داعش کے 100 عراقی جنگجوؤں کو وطن واپس بلا لیا ہے جو شمال مشرقی شام میں کرد فورسز کے زیر حراست تھے۔
عراق میں بم دھماکے بدستور جاری ہیں، عراقی فوج کے مطابق عراق کے جنوبی شہر بصرہ کے مرکز میں منگل کو ہونے والے ایک موٹرسائیکل دھماکے میں کم از کم چار افراد ہلاک اور چار دیگر زخمی ہو گئے ہیں۔
اقوام متحدہ کی سلامتی کونسل نے بدھ کے روز عراق میں حالیہ دہشت گرد حملوں کی شدید مذمت کی ہے، جن میں درجنوں افراد ہلاک یا زخمی ہوئے، ان حملوں کی ذمہ داری داعش نے قبول کر لی ہے۔
