امریکا نے برف سے ڈھکے علاقے الاسکا میں تیل کی تلاش کے لیے کھدائی کے منصوبے کی منظوری دے دی، ماہرین ماحولیات صدر بائیڈن کے اس اقدام کی شدید مذمت کر رہے ہیں۔
امریکی میڈیا رپورٹ کے مطابق امریکا نے ماحولیاتی خطرے کے باوجود برفانی خطے الاسکا میں تیل کی تلاش کے منصوبے کی منظوری دے دی ہے۔
امریکی صدر جو بائیڈن انتظامیہ کی جانب سے شمال مغربی امریکی ریاست میں ولو پروجیکٹ کی منظوری دے دی گئی ہے، جس پر ماحولیاتی گروپوں کی جانب سے شدید مذمت کی گئی ہے۔
امریکا نے شمال مغربی ریاست الاسکا میں تیل اور گیس کی کھدائی کے جس متنازعہ منصوبے کی منظوری دی ہے، ماہرین ماحولیات کے مطابق یہ منصوبہ صدر جو بائیڈن کے آب و ہوا کے وعدوں کے خلاف ہے۔
امریکی محکمہ داخلہ کے اعلان کے مطابق اس نے الاسکا کے پیٹرولیم سے مالا مال شمالی علاقے میں تیل کی تلاش کے لیے 7 بلین ڈالرز کی منظوری دی ہے۔
خیال رہے کہ امریکا پہلے ہی اس علاقے میں 5 ڈرل سائٹس، درجنوں کلومیٹر سڑکیں، 7 پل اور متعدد پائپ لائنز بچھا چکا ہے۔
ماہرین ماحولیات کے تحفظات کے بعد محکمہ داخلہ نے گزشتہ ماہ یہ کہنے کے بعد 3 ڈرل پیڈز کے ساتھ اس منصوبے کی منظوری دی تھی کہ وہ اس کے گرین ہاؤس گیس کے اثرات کے بارے میں فکر مند ہے۔
امریکا نے درخواست کردہ ڈرل پیڈز کو مسترد کرتے ہوئے کمپنی کے تجویز کردہ سائز کو بھی 40 فیصد تک کم کر دیا ہے۔
امریکی محکمہ داخلہ نے کہا کہ اس سے منصوبے کے میٹھے پانی کے استعمال میں کمی آئے گی اور 18 کلو میٹر سڑکوں، 32 کلو میٹر پائپ لائنوں اور 54 ہیکٹر بجری کی ترقی کو روک دیا جائے گا۔
