واشنگٹن : امریکا نے خیبر پختونخواہ حکومت کی جانب سے دارالعلوم حقانیہ کو تین ملین ڈالرز کی فنڈنگ دینے کے معاملے پر تبصرہ کرنے سے معذرت کر لی.
تفصیلات کے مطابق واشنگٹن میں ایک بریفنگ کے دوران اے آر وائی نیوز کے نمائندے کے سوال پر امریکی محکمہ خارجہ کے ترجمان جان کربی کا کہنا تھا کہ وہ کے پی حکومت کی جانب سے دارالعلوم حقانیہ کو فنڈز دینے کی خبروں سے آگاہ ہیں تاہم اس حوالے سے کوئی بھی سوال خیبرپختونخواہ حکومت یا پاکستانی حکومت سے کیا جائے.
امریکی محمکہ خارجہ کے ترجمان کی بریفنگ کے دوران صحافی کی جانب سے سوال کیا گیا کہ دارلعلوم حقانیہ کو سویت جنگ کے دوران امریکی حکومت اور سی آئی اے کی جانب سے بھی فنڈنگ دی گئی تھی،جس پرجان کربی نے تبصرہ کرنے سے گریز کیا.
انہوں نے مزید کہا کہ چین پاکستان اقتصادی راہداری منصوبے پر وہ امریکا اور پاکستان کے درمیان ہونے والے سفارتی بات چیت کی تفصیلات سے آگاہ نہیں کر سکتے.
