کراچی: امریکا نے پاکستان کے ساتھ سبز اتحاد برقرار رکھنے کا عزم کیا ہے، امریکی سفیر ڈونلڈ بلوم نے کراچی کا دورہ کر کے اس عزم کا اعادہ کیا۔
تفصیلات کے مطابق امریکی سفیر ڈونلڈ بلوم 2 روزہ دورے پر کراچی آئے ہیں، انھوں نے مختلف شعبہ ہائے زندگی سے تعلق رکھنے والی شخصیات سے ملاقاتیں کیں۔
امریکی سفیرڈونلڈ بلوم نے کہا کہ پاکستان کے ساتھ سبز اتحاد برقرار رکھنے کے لیے ہم پر عزم ہیں، امریکا اور پاکستان کی حکومتوں کی جانب سے پائیدار اور وسیع البنیاد معاشی ترقی کے لیے کئی طرح سے مشترکہ کردار ادا کیا جا سکتا ہے۔
انھوں نے کہا امریکا سمجھتا ہے کہ سبز اتحاد پاکستان میں نجی شعبہ جات اور ماحول دوست ذراعت کی ترقی و ترویج کے لیے کوشاں ہے، امریکا ایک لحاظ سے باہمی تجارت کے حوالے سے پاکستان کا سب سے بڑا شراکت دار ہے۔
ڈونلڈ بلوم کا کہنا تھا کہ امریکا ان ممالک کی فہرست میں سب سے اوپر ہے، جن کی پاکستان میں بیرونی سرمایہ کاری بڑھانے کے لیے خدمات غیر معمولی اہمیت کے حامل ہیں۔
امریکی سفیر نے کہا گزشتہ برسوں میں امریکا کی جانب سے پاکستان میں 50 فی صد سے زیادہ سرمایہ کاری کی گئی۔