لاہور : وزیراعلیٰ پنجاب عثمان بزدار نے مختلف شہروں میں رمضان بازاروں کا دورہ کیا اور اشیائے خورو نوش کی قیمتوں اور معیار کا جائزہ لیا، ایک ضعیف دیہاتی خاتون نے جذبات میں آکر ان کو ڈھیروں دعائیں دیں۔
تفصیلات کے مطابق وزیراعلیٰ پنجاب عثمان بزدار بہاولپور، رحیم یار خان اور صادق آباد میں رمضان بازاروں کے دوروں کے دوران اسٹال مالکان اور خریداری کے لیے آئے ہوئے لوگوں سے گھل مل گئے۔
انہوں نے متعلقہ افسران سے رمضان بازار میں فراہم کردہ اشیاء کی کوالٹی، مقدار اور نرخوں کے حوالے سے تفصیلی معلومات حاصل کیں اور عوام کو ریلیف دینےکیلئے ہدایات بھی جاری کیں۔
اس موقع پر مختلف خواتین اور مردوں نے وزیراعلیٰ پنجاب کو اپنے درمیان پاکر انتہائی خوشی اور مسرت کا اظہار کیا۔ ایک دیہاتی خاتون نے جذباتی انداز میں وزیر اعلیٰ کو بہت سی دعائیں دیں۔
وزیر اعلیٰ عثمان بزدار نے معمر بزرگ خاتون کے احترام کے طورپر مقامی رواج کے مطابق ان کے سر پر ہاتھ رکھا اور انہیں مالی امداد کا تحفہ پیش کیا۔
