The news is by your side.

Advertisement

لاہور اور دیگر شہروں سے بارش کے پانی کی نکاسی نہ ہونے پر عثمان بزدار سخت برہم

لاہور: وزیر اعلیٰ پنجاب عثمان بزدار نے لاہور اور دیگر شہروں سے بارش کے پانی کی نکاسی نہ ہونے پر سخت برہمی کا اظہار کرتے ہوئے ذمہ داران کے خلاف کارروائی کا عندیہ دے دیا۔

تفصیلات کے مطابق وزیر اعلیٰ پنجاب عثمان بزدار نے شہری انتظامیہ اور واٹر اینڈ سینی ٹیشن ایجنسی (واسا) حکام سے رابطہ کیا، وزیر اعلیٰ نے لاہور اور دیگر شہروں سے بارش کے پانی کی نکاسی نہ ہونے پر سخت برہمی کا اظہار کیا۔

وزیر اعلیٰ کا کہنا تھا کہ بارش کے پیش نظر پیشگی اقدامات کیوں نہیں کیے گئے، بارش ہوئے کئی گھنٹے گزر گئے پانی کیوں کھڑا ہے؟

انہوں نے ہدایت کی کہ واسا حکام مرکزی اور رابطہ سڑکوں پر جمع پانی کی نکاسی پر توجہ دیں، جہاں جہاں پانی جمع ہے افسران اپنی نگرانی میں وہاں سے نکاسی مکمل کروائیں۔

وزیر اعلیٰ کا کہنا تھا کہ پانی کھڑا ہونے سے معمولات زندگی بری طرح متاثر ہو رہے ہیں، نکاسی آب کا عمل فوری توجہ کا متقاضی ہے، غفلت کی گنجائش نہیں۔

انہوں نے لاہور اور پنجاب کے مختلف اضلاع میں پانی کی نکاسی نہ ہونے پر ذمہ داران کے خلاف کارروائی کا عندیہ بھی دیا۔

خیال رہے کہ اس سے قبل عید الاضحیٰ کے موقع پر بھی وزیر اعلیٰ نے کہا تھا کہ صفائی پر کوئی سمجھوتہ نہیں کیا جائے گا، شکایت آنے پر عملے کے خلاف تادیبی کارروائی ہوگی۔

وزیر اعلیٰ نے صفائی آپریشن مؤثر انداز سے جاری رکھنے کی ہدایت کرتے ہوئے کہا تھا کہ آپریشن پر مامور گاڑیاں گلیوں، سڑکوں اور محلوں کا گشت کرتی رہیں اور صفائی کا کام جلد مکمل کریں۔

Comments

یہ بھی پڑھیں