لاہور: وزیراعلیٰ پنجاب عثمان بزدار کا کہنا ہے کہ اپنے امیدواروں کوکامیاب کرانےکیلئےحکمت عملی طےکر لی ہے ، انشااللہ سینیٹ الیکشن میں اکثریتی پارٹی بن کر سامنے آئیں گے۔
تفصیلات کے مطابق وزیراعلیٰ پنجاب عثمان بزدار سے پی ٹی آئی کے چیف آرگنائزر سیف اللہ اور وفد کی ملاقات ہوئی ، ملاقات میں سیاسی صورتحال، پارٹی امور اور سینیٹ کے انتخابات پر گفتگو کی گئی۔
عثمان بزدار نے کہا کہ سینیٹ الیکشن میں منڈیاں لگانے والوں کوناکامی کا سامناکرنا پڑے گا، اوپن بیلٹ کی مخالفت کرنے والوں کوشکست نظر آ رہی ہے، ہارے ہوئے عناصر کو ایک بار پھر منہ کی کھانی پڑے گی۔
وزیراعلیٰ پنجاب کا کہنا تھا کہ الیکشن میں شفافیت کےلیےاوپن بیلٹ ضروری ہے، اپنے امیدواروں کوکامیاب کرانےکیلئےحکمت عملی طےکر لی ، انشااللہ سینیٹ الیکشن میں اکثریتی پارٹی بن کر سامنے آئیں گے، عوام اپوزیشن عناصر کے دوغلے چہروں کو پہچان چکے ہیں۔
اس موقع پر سیف اللہ خان نیازی نے کہا کہ وزیراعظم اورآپ نےحکومتی امور میں شفافیت کی مثال قائم کی ، عوام کوتحریک انصاف کی قیادت پر مکمل اعتماد ہے۔
پی ٹی آئی کے چیف آرگنائزر کا کہنا تھا کہ اپوزیشن کا منفی بیانیہ پٹ چکا ہے، اوپن بیلٹ کی مخالفت سے ان کےچہرے سے لبادہ اتر چکا ہے، یہ لوگ صرف پیسے کی سیاست کرنے کےعادی ہیں۔
