The news is by your side.

Advertisement

وزیراعلیٰ پنجاب کا شیخوپورہ میں بچوں پرتشدد کے واقعے کا نوٹس

لاہور: وزیراعلیٰ پنجاب سردار عثمان بزدار نے شیخوپورہ میں بچوں پر تشدد کے واقعے کا نوٹس لیتے ہوئے آر پی او شیخوپورہ سے رپورٹ طلب کرلی۔

تفصیلات کے مطابق وزیراعلیٰ پنجاب نے شیخوپورہ کے علاقے نارنگ منڈی میں بچوں پر تشدد کے واقعے کا نوٹس لیتے ہوئے آر پی او کو انکوائری کا حکم دے دیا۔

سردار عثمان بزدار نے کہا کہ بچوں پر تشدد کے ذمہ دار افراد کے خلاف قانون کے تحت کارروائی عمل میں لائی جائے۔ انہوں نے یقین دہانی کرائی کہ تشدد کا نشانہ بننے والے بچوں کو ہرصورت انصاف فراہم کیا جائے گا۔

وزیراعلیٰ پنجاب نے مزید کہا کہ کسی کو بھی قانون ہاتھ میں لینے کی اجازت نہیں دی جاسکتی۔

یاد رہے کہ گزشتہ روز شیخوپورہ کے علاقے نارنگ منڈی میں ریل بازار کے بااثر دکانداروں نے 4 معصوم بچوں کو دکان سے ٹافیاں اور پیسے چوری کرنے کے شبہ میں پکڑا اور ہاتھ باندھ کر وحشیانہ تشدد کا نشانہ بنایا۔

دکانداروں نے بچوں کے سر مونڈ ڈالے اور منہ کالے کرکے بازار کا چکر لگوایا، بچوں کی حالت غیر ہونے پر بھرے بازار میں انہیں پھینک دیا۔

راہگیروں نے بچوں کو نجی اسپتال پہنچایا جہاں طبی امداد دینے کے بعد بچوں کو والدین کے حوالے کردیا گیا۔

Comments

comments

یہ بھی پڑھیں