اسلام آباد : پاکستان تحریک انصاف کے رہنما عثمان ڈار کو وزیراعظم یوتھ پروگرام کا چیئرمین تعینات کردیا گیا ، عثمان ڈار کا کہنا ہے کہ وزیراعظم نے جو اعتماد ظاہر کیا اس پر پورا اتروں گا۔
تفصیلات کے مطابق وزیراعظم عمران خان نے پاکستان تحریک انصاف کے رہنما عثمان ڈار کو وزیراعظم یوتھ پروگرام کا چیئرمین تعینات کرنے کی منظوری دے دی ہے ، جس کا نوٹی فکیشن جاری کردیا گیا ہے۔
وزیراعظم کا کہنا ہے کہ نوجوانوں کی نمائندگی کے لیےعثمان ڈاربہترین انتخاب ہیں، یوتھ پروگرام کےذریعے نوجوانوں کے لیے انقلابی اقدامات کیے جائیں۔
رہنما پی ٹی آئی عثمان ڈار نے کہا کہ وزیراعظم نے جو اعتماد ظاہر کیا اس پرپورااتروں گا،انھوں نے نوجوانوں کو با اختیار بنانے کا ٹاسک سونپا ہے۔
عثمان ڈار نے سابق دور حکومت میں لیپ ٹاپ اسکیم میں مبینہ کرپشن کے آڈٹ کا اعلان کرتے ہوئے کہنا تھا کہ لیپ ٹاپ مہنگے داموں خرید کر قومی خزانے کو نقصان پہنچایا گیا۔
انھوں نے مزید کہا نوجوانوں کوحکومتی سرپرستی میں ترقی کے مواقع دیں گے، نوجوانوں کے لیے زبردست پالیسیاں اور اسکیم لائیں گے، نوجوانوں کو کامیاب روزگار اور بہترین تربیت مہیا کرنا ترجیح ہوگی۔
خیال رہے 25 جولائی کو ہونے والے عام انتخابات میں این اے 73 سے ن لیگ کے خواجہ آصف 116975 ووٹ لے کر کامیاب ہوئے تھے جبکہ تحریک انصاف کے امیدوار عثمان ڈار دوسرے نمبر پر تھے۔
جس کے بعد تحریک انصاف کےامیدوارعثمان ڈار نے حلقے میں ووٹوں کی دوبارہ گنتی کی درخواست دی تھی ، تاہم ووٹوں کی دوبارہ گنتی کے بعد مسلم لیگ ن کے رہنما خواجہ آصف اپنی جیت برقرار رکھنے میں کامیاب رہے تھے۔
یاد رہے 22 ستمبر کو این اے 73 سیالکوٹ سے تحریک انصاف کے امیدوار عثمان ڈار نے الیکشن ٹربیونل میں مسلم لیگ نون کے خواجہ محمد آصف کی کامیابی چیلنج کی تھی اور کہا تھا خواجہ آصف نے اپنے کاغذات نامزدگی میں اثاثے چھپائے۔
