اسلام آباد : تحریک انصاف کے رہنما اور وزیر اعظم کے معاون خصوصی عثمان ڈار نے کہا ہے کہ وزیراعظم کی اولین ترجیح گڈ گورننس اور مہنگائی پر قابو پانا ہے، حکومت آئندہ دو سال میں اپنے منصوبوں کو مکمل کرے گی۔
ان خیالات کا اظہار انہوں نے اے آر وائی نیوز کے پروگرام سوال یہ ہے میں گفتگو کرتے ہوئے کیا۔ وزیر اعظم کے معاون خصوصی کا کہنا تھا کہ مصنوعی مہنگائی کرنے والوں کےخلاف کریک ڈاؤن کرنا پڑا تو ضرور کریں گے۔
انہوں نے کہا کہ وزیراعظم عمران خان کی اولین ترجیح ملک میں گڈگورننس اور مہنگائی کے جن پر قابو پانا ہے، مہنگائی اور گڈ گورننس کو چند ماہ میں قابو کرلیا جائے گا۔ ہماری بیورکریسی اس طرح کام کرنے کی عادی نہیں ہے جیسے تیزی سے ہم کام کرناچاہ رہے ہیں۔
ایک سوال کے جواب میں انہوں نے کہا کہ کارکردگی کی بنیاد پر پنجاب کے وزیر تبدیل ہونے چاہئیں تو ہوں، پنجاب کے رقبے کےلحاظ سے اس کےمسائل بھی بہت زیادہ ہیں، عثمان بزدار ٹیم ورک کے ساتھ پنجاب میں کام کررہے ہیں، عثمان بزدارکی ٹی ٹیاں نہیں پکڑی گئیں اور نہ ہی کوئی بیٹا مفرور ہے۔
عثمان ڈار نے کہا کہ ہمیں ذمہ داری کے ساتھ بیان دینے کی ضرورت ہے ، میں ساتھی وزراء کو پیغام دیتا ہوں کہ الفاظ کا چناﺅسوچ سمجھ کر کریں، فارن فنڈنگ کیس پر پریشان نہیں، ہمارا دامن صاف ہے، پی ٹی آئی 40ہزاررسیدیں جمع کراچکی ہے،
ان کا مزید کہنا تھا کہ پوری اپوزیشن کنٹینر پرتھی ناکامی کے بعد الیکشن کمیشن چلی گئی، اپوزیشن والے اتنے کمزور ہوگئے کہ عوام نے بھی انہیں رد کردیا، دھرنے کی طرح اپوزیشن کو الیکشن کمیشن میں بھی شرمندگی کاسامنا ہوگا۔
