کراچی : معروف غزل گائیک استاد غلام علی خان سے کون واقف نہیں؟ ان کی گائی ہوئی غزلیں نہ صرف پاکستان بلکہ بھارت اور بنگلہ دیش سمیت پوری دنیا میں سنی جاتی ہیں۔
اے آر وائی نیوز کے پروگرام "ہوشیاریاں” میں گلوکار غلام علی خان کو بطور مہمان خصوصی مدعو کیا گیا اس موقع پر انہوں نے اپنے ماضی میں ہونے والے واقعات اور دیگر شخصیات سے متعلق بہت سی باتیں شیئر کیں۔
انہوں نے بتایا کہ جنرل ضیاء الحق موسیقی سے بے انتہا شغف اور اس کو سمجھنے والے حکمران تھے، اور کافی حد تک سروں کی اونچ نیچ سے بھی واقف تھے۔
استاد غلام علی خان نے بتایا کہ جب مجھے ستارہ امتیاز دیا گیا وہ اعزاز مجھے جنرل ضیاءالحق صاحب کے ہاتھوں سے ملا، تقریب کے موقع پر انہوں نے مجھے کہا کہ تم بہت سریلا گاتے ہو۔
انہوں نے بتایا کہ کسی تقریب کے دوران میں اپنی غزل "ہنگامہ ہے کیوں برپا” گا رہا تھا تو بعد میں جنرل ضیا ء نے مجھ سے کہا کہ واہ بھئی راگ درباری بہت خوب گایا ہے تم نے۔
پاکستان کے مشہور کامیڈین امان اللہ سے متعلق استاد غلام علی خان نے بتایا کہ وہ بہت ہی نفیس اور محبت کرنے والی شخصیت تھے، اور میرے ساتھ ان کی بہت اچھی دوستی تھی۔