وزیر اطلاعات پنجاب عظمیٰ بخاری کا کہنا ہے کہ سندھ بھی کسی وڈیرے کی جاگیر نہیں جسے آپ ہر فورم پر سندھو دیش کہتے ہیں۔
اے آر وائی نیوز کے مطابق وزیر اطلاعات پنجاب عظمیٰ بخاری نے پیپلزپارٹی رہنماؤں کے بیان پر ردعمل دیتے ہوئے کہا کہ شعلے اگلتی زبانوں کے ساتھ ہم سے سیز فائر کی امید کیسے رکھتے ہیں، جس کو دیکھو وہ جھاڑ پونچھ کرکے گھر سے نکلتا اور مائیک آگے رکھ کر بیٹھ جاتے ہیں۔
انہوں نے کہا کہ شعلے نکالنے، گالیاں دینے پھر ان حالات میں مفاہمت کی بات کیسے کرتے ہیں؟ جواب دو تو رونے بیٹھ جاتے ہیں، ان کے مسلسل اشتعال کے بعد تھوڑا سا جواب آتا ہے۔
یہ پڑھیں: پنجاب کے بلدیاتی انتخابات کراچی جیسے بوگس نہیں ہوں گے، عظمیٰ بخاری
عظمیٰ بخاری نے کہا کہ جمہوریت کا لیکچر ہمیں مت دیں، آپ نے جمہوریت اپنے نازک کندھوں پر نہیں اٹھائی، آپ دن رات ہماری لیڈر شپ پر حملے کریں گے تو کیا ہم پھولوں کے ہار پہنائیں گے۔
وزیر اطلاعات پنجاب نے کہا کہ پی پی رہنما ایک طرف سیز فائر کی باتیں کرتے ہیں دوسری طرف ہر گھنٹے بعد ہوائی فائرنگ کرنے آجاتے ہیں، یہ ہماری لیڈر شپ اور پارٹی کی اعلیٰ ظرفی ہے جو ذاتی حملوں کے بعد بھی خاموش ہے۔
اے آر وائی نیوز کی ڈیجیٹل ڈیسک کی جانب سے شائع کی گئی خبریں