لاہور (5 اکتوبر 2025): وزیر اطلاعات عظمیٰ بخاری نے کہا ہے کہ پنجاب کے بلدیاتی انتخابات جب بھی ہوں گے کراچی جیسے بوگس نہیں ہوں گے۔
اے آر وائی نیوز کے مطابق مریم نواز کے نہروں سے متعلق ایک بیان کے بعد پیپلز پارٹی اور ن لیگ کے رہنماوں کا ایک دوسرے پر الزامات کا سلسلہ جاری ہے۔
آج ایک بار پھر سندھ کے سینئر وزیر شرجیل میمن نے مریم نواز حکومت کو نتقید کا نشانہ بنایا تو اس کے بعد پنجاب کی وزیر اطلاعات عظمیٰ بخاری نے اس پر ردعمل ظاہر کرتے ہوئے کہا ہے کہ پنجاب میں بلدیاتی انتخابات کے لیے اپنی ڈیڈ لائن اپنی جیب میں رکھیں۔ یہاں جب بھی بلدیاتی الیکشن ہوں گے کراچی جیسے بوگس نہیں ہوں گے۔
عظمیٰ بخاری کا کہنا تھا کہ آپ ایک صوبے کے اندر زبردستی گھس کر لڑنے کی کوشش کر رہے ہیں۔ میرا پانی میری مرضی ایسے ہی ہے، جسیے مرسو مرسو پانی نہ دیسو۔ آپ دن رات پانی پر مرسو مرسو کریں اور پنجاب پر تنقید کرتے رہیں تو ایسا نہیں چلے گا۔
وزیر اطلاعات پنجاب کا کہنا تھا کہ آپ مریم نواز کی مقبولیت سے خوفزدہ نہ ہوتے تو آج چھٹی کے دن بھی پریس کانفرنس نہ ہوتی۔ آپ نے سیلاب متاثرین کے لیے صرف طعنے بھیجے اور ان کی محرومیوں پر تماشا لگایا۔ اس کے علاوہ پی پی نے پنجاب اور سندھ میں سیلاب متاثرین کی ایک دھیلے کی بھی مدد نہیں کی۔
انہوں نے پنجاب حکومت پر وزیراعظم کیخلاف سازش کرنے کے الزام کا جواب دیتے ہوئے کہا کہ آپ خود وفاق اور پنجاب کے خلاف سازش کر رہے ہیں۔ بلاول بھٹو بطور وزیر خارجہ وفاق اور وزیراعظم کی جڑیں کھوکھلی کرتے رہے اور قوم وہ سب بھولی نہیں ہے۔
وزیر اطلاعات نے مزید کہا کہ وفاق اور پنجاب کو دھمکیوں اور پیڈ احتجاج کراکر بلیک میل کرنا آپ کا ہی طرہ امتیاز ہے۔ آپ پنجاب کو حکم دینے والے کون ہوتے ہیں، اپنے حکم اور مشورے اپنی جیب ہی رکھیں۔
عظمیٰ بخاری کا کہنا تھا کہ جب آپ سے آپ کی کارکردگی پوچھی جاتی ہے، تو صوبائیت کارڈ کھیلنا شروع کر دیتے ہیں۔ کراچی کا کچرا، ٹوٹی سڑکوں، کرپشن کی بات کریں تو لسانیت اور مرسو مرسو کا کارڈ لے آتے ہیں۔ بینظیر انکم سپورٹ کارڈ کھیلنا اس کو سیاست نہیں غلاظت کہتے ہیں۔
انہوں نے شرجیل میمن کا چیلنج قبول کرتے ہوئے کہا کہ بحث کے لیے جگہ اور وقت آپ کی پسند کا ہوگا۔ مگر آپ خود آئیے گا، کسی پراکسی کے پیچھے مت چھپیے گا۔
پنجاب حکومت پیپلز پارٹی کی آڑ میں وزیر اعظم کو نشانہ بنا رہی ہے، شرجیل میمن
