کوئٹہ: مسلم لیگ (ن) کی رہنما عظمیٰ بخاری نے کوئٹہ میں مریم نواز کے کمرے کی چوکیداری سنبھال لی۔
اے آر وائی نیوز کی رپورٹ کے مطابق مسلم لیگ ن کی رہنما عظمیٰ بخاری نے مریم نواز کے کمرے کی چوکیداری سنبھال لی، مریم نواز کل کوئٹہ میں پی ڈی ایم کے جلسے میں شرکت کریں گی۔
ذرائع کا کہنا ہے کہ کوئٹہ جلسے کے حوالے سے جس کمرے میں مریم نواز مقیم ہیں اس کی سیکیورٹی کے فرائض عظمیٰ بخاری کے سپرد کردئیے گئے ہیں۔
عظمیٰ بخاری کا کہنا ہے کہ ’کمرے کا تالا بہت مضبوط ہے، امید ہے سلامت رہے گا اور آئی جی صاحب بھی چھٹی پر نہیں جائیں گے، اگر کسی نے اس طرف دیکھنے کی کوشش کی تو یاد رکھیں ہم سب بہت چوکنا ہیں۔‘
انہوں نے کہا کہ اب یہ دروازہ انشا اللہ سلامت رہے گا، اگر کسی کو ایڈونچر کا شوق ہے تو آجائے ہم یہیں پر موجود ہیں۔
واضح رہے کہ پاکستان ڈیمو کریٹک موومنٹ (پی ڈی ایم) کل کوئٹہ میں حکومت مخالف جلسہ کرے گی، جلسے سے چیئرمین پیپلزپارٹی بلاول بھٹو، جے یو آئی (ف) کے سربراہ مولانا فضل الرحمان خطاب کریں گے۔
یاد رہے کہ جلسے میں شرکت کے لیے مریم نواز کوئٹہ پہنچ گئی ہیں، پیپلزپارٹی کے چیئرمین بلاول بھٹو زرداری آج رات کوئٹہ کے لیے روانہ ہوں گے جبکہ مولانا فضل الرحمان بھی کوئٹہ پہنچ گئے ہیں۔
