اوٹاوا: آپ نے ریسٹورنٹ کے کچن میں چوہے تو گھومتے ہی دیکھیں ہوں گے لیکن خاتون گاہک نے ویڈیو بنا کر ہوٹل انتظامیہ کی صفائی کا پردہ چاک کردیا۔
تفصیلات کے مطابق کینیڈا کے شہر ’وینکونور‘ کے ایک ریسٹورنٹ میں ایسا منفرد واقعہ پیش آیا جس نے کھانے پینے کے شوقین افراد کو نہ صرف چونکایا بلکہ وہ سوچنے پر بھی مجبور ہوگئے۔
غیر ملکی خبر رساں ادارے کے مطابق وینکونور میں واقع ریسٹورنٹ میں کھانے کے لیے آئی خاتون نے جب اپنے من پسند سوپ کا آرڈر کیا تو اسے عجیب کیفیت سے گزرنا پڑا جس کا شاید اُس نے کبھی تصور بھی نہ کیا تھا۔
مزید پڑھیں: منفرد ریسٹورنٹ: جہاں ویٹرز گونگے بہرے ہیں
’پائی سن‘ نامی کینیڈین خاتون کا کہنا تھا کہ اس نے ریسٹورنٹ میں ’چوڈر‘ (خاص قسم کا سوپ) پینے کی خواہش کا اظہار کیا، جب سوپ پیش کیا گیا تو اس کے اندر چوہا بھی تھا۔
خاتون نے موقع پاتے ہی منظر کو کیمرے میں محفوظ کیا اور سماجی رابطے کی ویب سائٹ پر پوسٹ کردیا، جس کے بعد سماجی رابطے کی ویب سائٹ پر ایک نئی بحث چھڑ گئی اور ریسٹورنٹ انتظامیہ کو صارفین نے شدید تنقید کا نشانہ بنایا۔
دوسری جانب ہوٹل انتظامیہ نے واقعے کی تردید کرتے ہوئے کہا ہے کہ ہمارے کچن میں صفائی کا خاص خیال رکھا جاتا ہے، اگر کسی کو شک ہے تو وہ دورہ بھی کرسکتا ہے۔
یہ بھی پڑھیں: اسلام آباد کا پہلا ریسٹورنٹ، جہاں ہرطرف خوف ہے
بعد ازاں فوڈ اتھارتی کی کارروائی کے نتیجے میں ریسٹورنٹ کو جرمانے کے طور پر ایک دن کے لیے بند کیا گیا، تاہم انتظامیہ واقعے کی ذمہ داری قبول کرنے سے تاحال انکاری ہے۔
