کینبرا : آسٹریلوی بچہ سورج سے الرجی کی انتہائی نایاب بیماری میں مبتلا ہے جو اس کےلیے جان لیوا بھی ثابت ہوسکتی ہے۔
غیر ملکی خبر رساں ادارے کی رپورٹ کے مطابق آسٹریلوی ریاست وکٹوریہ سے تعلق رکھنے والے ڈیڑھ سالہ جارج کو انتہائی نایاب بیماری لاحق ہے جس کے باعث وہ دن میں گھر سے باہر بھی نہیں نکل سکتا۔
میلبرن میں مقیم جارج میڈرن کو سورج سے الرجی ہے اور ’Xeroderma pigmentosum‘ نامی بیماری اس قدر نایاب ہے کہ کروڑوں افراد میں سے صرف کسی ایک کو ہی لاحق ہوتی ہے جس کے باعث متاثرہ شخص کو سورج کی روشنی سے تکلیف ہوتی ہے۔
مذکورہ بیماری کے باعث جارج اور اس کے والدین کو تکالیف اور مشکلات کا سامنا کرنا پڑرہا ہے۔
وکٹورین بچے کو جب سورج کی روشنی میں باہر لیجانا ہوتا ہے تو والدین جارج کو اچھی طرح کپڑوں میں لپیٹتے ہیں جبکہ گھر میں کھیلنے اور گھومنے پھرنے کےلیے بھی گھر کے تمام کھڑیوں اور روشن دانوں پر پردے لگائے گئے ہیں تاکہ سورج کی کرنوں کو اندر آنے سے روکا جاسکے۔
طبی ماہرین کا کہنا ہے کہ مذکورہ بیماری اس قدر خطرناک ہے کہ جارج کے جلد کے کینسر میں مبتلا ہونے کے خدشات کئی گناہ زیادہ ہوگئے ہیں۔
