صادق آباد: باراتیوں سے بھری کشتی الٹنے کی ویڈیو سامنے آ گئی۔
تفصیلات کے مطابق رحیم یار خان ماچھکہ میں دریائے سندھ میں باراتیوں سے بھری کشتی الٹنے کی الم ناک ویڈیو سامنے آ گئی ہے۔
ویڈیو میں باراتیوں سے بھری کشتی کو دریا میں الٹتے دیکھا جا سکتا ہے، ویڈیو کے مطابق دو کشتیوں پر گنجائش سے زائد افراد سوار تھے۔
ویڈیو میں یہ بھی دیکھا جا سکتا ہے کہ باراتیوں سے بھری کشتی کو حادثہ کنارے کے قریب پیش آیا، کشتی الٹتے دیکھ کر باراتیوں کو بچانے کے لیے دوسری کشتی کے سواروں نے چھلانگ لگا دی۔
مقامی افراد نے دونوں کشتیوں کو رسیوں کی مدد سے بمشکل قابو کیا، سر توڑ کوششوں کے باوجود کشتی الٹنے سے متعدد لوگ دریا میں ڈوب کر بہہ گئے۔
دریائے سندھ کشتی حادثہ، 28 افراد کی تلاش کے لیے ریسکیو آپریشن دوبارہ شروع
واضح رہے کہ اس حادثے میں تاحال 21 افراد کی لاشیں نکالی گئی ہیں، جب کہ 28 افراد ابھی بھی لاپتا ہیں، جن کی تلاش کے لیے آج صبح ریسکیو آپریشن پھر شروع کیا گیا ہے۔
